2 Chronicles 21
1 約沙法死後，葬在大衛城个王室墳墓肚。厥孻仔約何蘭承接佢做王。
2 猶大王約沙法个孻仔約何蘭有六個兄弟；佢等个名係：亞撒利雅、耶歇、撒迦利雅、亞撒列夫、米迦勒、示法提雅。
3 佢等个阿爸給佢等當多金銀㧯其他值錢个東西，派佢等管理猶大个防衛城。因為約何蘭係長子，約沙法立佢做太子。
4 約何蘭堅固自家个王位後，將該兜老弟全部㓾掉，也㓾掉好多以色列个官員。
5 約何蘭三十二歲个時做王，在耶路撒冷統治八年。
6 佢討亞哈个妹仔做𡜵娘，所以佢就像亞哈屋下个人共樣，做以色列該兜王所做、上主看做邪惡个事。
7 總係上主毋肯滅大衛个王朝；因為佢識㧯大衛立約，答應佢，講佢个子孫愛永遠有人做王。
8 約何蘭在位期間，以東造反，對猶大獨立出去，自家設立王。
9 所以約何蘭帶領軍隊、戰車去攻打以東人，反轉卻被佢等包圍，到暗晡時正逃走。
10 恁樣，對該日以後，以東就對猶大獨立出去。在這期間，立拿城也造反，因為約何蘭離開上主—厥祖先个上帝。
11 佢甚至在猶大个山岡頂起神廟，害猶大㧯耶路撒冷个人民犯淫亂得罪上主。
12 先知以利亞寫信仔給約何蘭講：「上主—若祖先大衛个上帝責備你；因為你無學若爸約沙法㧯若公猶大王亞撒个好模樣，
13 反轉去學以色列該兜王个壞樣，帶領猶大㧯耶路撒冷个人民行淫亂悖逆上帝，像亞哈㧯佢个繼承人共樣帶領以色列人悖逆上帝。你甚至㓾掉該兜老弟，實在佢等比你較好。
14 所以，上主愛嚴嚴責罰你个人民、你个子女、㧯𡜵娘、細姐，又毀壞你一切个財物。
15 你本人會發一種嚴重个腸仔病，一日比一日厲害，直到腸仔落下來。」
16 有兜非利士人㧯住在古實邊堘个阿拉伯人；上主使佢等來攻打約何蘭。
17 佢等攻入猶大，放勢搶王宮，將王个𡜵娘、細姐㧯該兜孻仔全部捉去，只有賸到佢个滿子亞哈謝。
18 這兜事以後，上主使王發一種嚴重个腸仔病；
19 這種病大約拖兩年久，一日比一日較嚴重，腸仔落下來，最尾痛苦到死。佢个人民並無為佢行燒火禮，無像人民對厥祖先所做个恁樣。
20 約何蘭三十二歲做王，在耶路撒冷統治八年。佢死个時無人思念佢。佢等將佢葬在大衛城，總係無葬在王室个墳墓肚。