1 Samuel 6
1 上主个約櫃在非利士地區停留七個月以後，
2 非利士人請祭司㧯卜卦个來，問佢等：「𠊎等應該樣般來處理上主个約櫃？指示𠊎等愛樣般將約櫃送轉原來个地方。」
3 佢等應講：「若係你等愛將以色列上帝个約櫃送轉去，應當向佢獻贖罪个禮物賠罪，做毋得單單將約櫃送轉去。恁樣，你等个病就會得到醫治，正會知做麼介上帝一直責罰你等。」
4 非利士人問：「𠊎等愛送麼介贖罪个禮物呢？」佢等應講：「用金仔做五隻粒仔㧯五隻老鼠。逐隻金粒仔㧯金老鼠代表一個非利士領袖，因為共樣个災難發生在你等㧯你等領袖个身上。
5 你等一定愛做毒粒仔个形像㧯毀壞你等田地老鼠个形像，向以色列个上帝承認你等个罪。恁樣，無一定佢就毋會繼續責罰你等㧯你等个神明、還有你等个土地。
6 你等何麼死苦像埃及王㧯埃及人恁硬頸？佢等被上帝㩢到無葛無煞，敢毋係乖乖放以色列人離開埃及？
7 所以，你等愛預備一輛新車㧯兩隻從來吂識掛過軛有乳个牛乸，將牛乸牽到車仔頭前，牛軛掛在牛乸个頸筋，還愛將牠兜个細牛仔逐轉牛欄。
8 愛將上主个約櫃放在車頂，堘頭另外放一個箱仔，底背裝該兜金仔个形像，就係你等贖罪个禮物，然後由在牛拉等車仔行。
9 你等愛注意車仔行个方向：若係它向伯‧示麥行，這災禍就係以色列个上帝降給𠊎等个；若係無向該地方行，𠊎等就知上帝無降災，這災禍係毋堵好堵到个。」
10 非利士人照佢等講个去做。佢等將兩隻有乳个牛乸落在車仔頭前，將細牛仔關在牛欄肚，
11 將上主个約櫃放在車頂，還有該裝金老鼠㧯金粒仔个箱仔也放在車頂。
12 牛乸在向伯‧示麥个路上，毋偏左抑毋偏右直直去；牠兜緊行緊噭。五個非利士人个領袖跈等牠兜，直到伯‧示麥个邊界。
13 伯‧示麥人民在山壢割麥仔；佢等頭那一擎起來，看到約櫃，大家就非常歡喜。
14 車仔來到伯‧示麥人約書亞个田肚，停在一垤大石頭堘頭。人民將車仔劈掉，將兩隻牛乸㓾掉做燒化祭獻給上主。
15 利未人將上主个約櫃㧯裝金仔个形像个箱仔扛下來，放在大石頭頂。該日，伯‧示麥人民向上主獻燒化祭㧯其他牲儀。
16 五個非利士人个領袖看到佢等所做个事，該日就轉以革倫去了。
17 非利士人獻五隻金粒仔給上主做贖罪个禮物：一個為亞實突、一個為迦薩、一個為亞實基倫、一個為迦特、一個為以革倫。
18 佢等也獻金老鼠，逐隻係為各非利士領袖管轄个城鎮，包含防衛个城鎮㧯無圍牆个村莊。伯‧示麥人約書亞田肚該垤大石頭，就係佢等放上主約櫃該垤大石頭，到這下還留在該位，做發生這事个證據。
19 上主㓾掉七十個伯‧示麥人，因為佢等偷看約櫃个底背。人民因為上主在佢等當中㓾掉恁多人就盡傷心。
20 伯‧示麥人講：「在上主這位神聖个上帝面前，麼人企得住呢？𠊎等做得將約櫃送到㖠位去、使它離開𠊎等呢？」
21 佢等派人去對基列‧耶琳城个人講：「非利士人將上主个約櫃送轉來了；請將約櫃接到你等該位去！」