1 Samuel 30
1 兩日後，大衛帶佢个部下轉到洗革拉。亞瑪力人已經侵犯猶大南片，進攻洗革拉。佢等燒掉城市，
2 將所有个婦女，還有城肚所有个人，無論大細全部捉走，總係無㓾掉。
3 大衛㧯佢个部下一到，發現城已經燒掉，佢等个𡜵娘子女全部被人捉走，
4 就大聲盡噭，噭到無氣力。
5 大衛个兩個𡜵娘—耶斯列人亞希暖㧯拿霸个寡婦迦密人愛比該，也被人捉走。
6 大衛个心情非常著急，因為佢个部下為子女盡艱苦，就講愛用石頭打死佢；總係大衛倚靠上主—佢个上帝，心肝就剛強。
7 大衛對亞希米勒个孻仔祭司亞比亞他講：「將以弗得帶到這位來！」亞比亞他就照佢个吩咐去做。
8 大衛求問上主，講：「𠊎應該去追該兜侵犯个人麼？𠊎能逐到佢等麼？」上主應講：「你去追。你一定逐得到，也會救轉你个人。」
9 所以，大衛㧯佢个部下六百人出發去到比梭溪；有一部份人留在該位。
10 大衛帶等四百人繼續追等去，其他兩百人因為當𤸁、當痶，無法度過比梭溪，就留在後背。
11 大衛个部下在野地發現一個埃及个細孻仔，就帶佢去見大衛。佢等給佢食物㧯水，
12 也給佢一些仔無花果餅㧯兩垤葡萄餅。佢食掉以後，就恢復元氣；因為佢已經三日三夜無食、無啉。
13 大衛問佢：「你个主人係麼人？你對㖠位來？」佢應講：「𠊎係埃及人，係亞瑪力人个奴才。因為𠊎三日前發病仔，主人就將𠊎豁在這位。
14 𠊎等侵犯猶大南部基利提个土地㧯迦勒族个土地；𠊎等也將洗革拉城燒掉。」
15 大衛問佢：「你願意帶𠊎去逐該兜侵略个亞瑪力人麼？」佢講：「若係你指等上帝个名答應毋㓾𠊎，也毋將𠊎交給𠊎个主人，𠊎願意帶你去。」
16 就恁樣，佢帶等大衛去逐佢等。該兜侵略个亞瑪力人分散到滿遍係，又食又啉，當歡喜慶祝，因為佢等對非利士㧯猶大搶來个財物當多。
17 第二日打早，大衛攻打佢等，一直打到臨暗仔；敵人除了四百個騎駱駝个後生人以外，無一個走掉。
18 大衛救轉亞瑪力人搶走个人㧯財物：佢救到佢兩個𡜵娘，
19 救到所有部下个子女，搶轉所有被亞瑪力人搶走个財物，無一項東西失掉。
20 大衛也搶轉所有个羊群㧯牛群；佢个部下逐等頭牲行在頭前，講：「這兜全部係大衛个！」
21 無幾久，大衛轉到兩百人停留个所在；這兜人當痶無法度跈佢共下去，留在比梭溪。佢等出來迎接大衛㧯佢个部下；大衛也親切㧯佢等請安。
22 總係有兜㧯大衛共下去个係鱸鰻仔㧯壞心个人；佢等講：「這兜人無㧯𠊎等共下去，𠊎等毋好將搶轉來个戰利品分給佢等。單單將佢等个𡜵娘、子女還佢等𢱋轉去就好了！」
23 總係大衛講：「弟兄啊，𠊎等做毋得恁樣處理上主所賜給𠊎等个；因為佢保護𠊎等平安，又使𠊎等打贏該兜侵略者。
24 無人會同意你等个話！所有个東西逐儕有份：留在後方看守武器个㧯出戰个應該平分戰利品。」
25 大衛將這個規矩定做條例；這條例以色列人對該日一直遵守下去。
26 大衛轉到洗革拉以後，將搶轉來个財物拿一部份送給佢个朋友，就係猶大該兜領袖，講：「這兜禮物係𠊎等對上主个敵人該位搶轉來个。」
27 大衛送禮物給伯特利个人，猶大南部拉末个人，又給雅提珥、
28 亞羅珥、息末、以實提莫、
29 拉哈勒這兜城市个人，也給耶拉篾族㧯基尼族這兜城市个人，
30 又給住在何珥瑪、歌拉珊，亞達
31 㧯希伯崙這兜城市个人。大衛㧯佢部下去過个所在，佢全部送禮物給佢等。