1 Samuel 20
1 大衛對拉瑪个拿約走去見約拿單，對佢講：「𠊎做麼介事？犯麼介罪？有麼介對毋起若爸个事，使佢愛㓾𠊎呢？」
2 約拿單應講：「你絕對毋會死！吾爸無論做麼介事，不管重要、無重要，全部會㧯𠊎講。這個事佢也毋會恬恬無㧯𠊎講，絕對毋會。」
3 總係大衛又發誓講：「若爸明明知你對𠊎恁好，所以佢毋會將計劃㧯你講，因為佢驚你傷心。𠊎指等永生个上帝，又敢在你面前發誓：𠊎離死亡賸一步腳定定！」
4 約拿單對大衛講：「你愛𠊎做麼介，𠊎絕對毋會推辭。」
5 大衛應約拿單講：「天光日係初一，𠊎本來應該㧯王共下食飯，總係求你俾𠊎去田肚囥到後日暗晡。
6 若係若爸看到𠊎無去食飯，請你㧯佢講：『大衛向𠊎請假趕轉伯利恆个老屋，因為佢全家這下當在該位獻年祭。』
7 若係佢講：『好！』恁樣若僕人就安全了；若係佢發譴，你就知佢係決心愛㓾𠊎。
8 請你施恩、遵守你㧯僕人在上主面前所立个誓約。若係𠊎有罪，你親手㓾死𠊎就好！樣愛使將𠊎交給若爸呢？」
9 約拿單講：「毋好恁樣想！若係𠊎確實知吾爸愛害你，𠊎敢毋會㧯你講嗎？」
10 大衛又問：「若係若爸發譴來應你，麼人來㧯𠊎講？」
11 約拿單應講：「𫣆兩儕來去田肚。」佢兩儕就共下去。
12 約拿單對大衛講：「願上主—以色列个上帝做𠊎等个證人！天光日㧯後日這個時節，𠊎會打探吾爸个意思。若係佢對你無惡意，𠊎會派人傳話給你；
13 若係吾爸存心愛害你，總係𠊎無㧯你講俾你好安全離開，願上主重重責罰𠊎。」約拿單又講：「願上主㧯你共下，像佢以前㧯吾爸共下一樣！
14 𠊎還生个日，你愛照上主不變个慈愛誠心實意款待𠊎；若係𠊎死掉，
15 你愛一直共樣誠心實意款待𠊎屋下人。當上主徹底消滅你个仇敵以後，
16 願你㧯𠊎个誓約永遠有效。若係你毀約，上主愛通過你个仇敵來責罰你。」
17 約拿單再一擺喊大衛發誓，因為佢非常惜大衛，就像惜自家个命一樣。
18 約拿單對大衛講：「天光日係初一，食飯个時你無在，人一定會發現；
19 後日你又無在，人還較會感覺。所以你愛到上擺囥个所在去，囥在石堆後背等等。
20 𠊎會將石堆準做箭靶，射出三支箭，
21 然後吩咐𠊎个僕人行過去尋箭。若係𠊎對僕人講：『箭在你後背，轉來這片尋出來！』該就係講你安全了，做得出來。𠊎指永生个上主發誓，你一定無危險。
22 若係𠊎㧯僕人講：『箭在你頭前』，你愛趕緊走！因為係上主愛你離開。
23 論到𫣆兩儕个誓約，有上主永遠在你㧯𠊎中間做證人。」
24 所以，大衛去囥在田肚。初一該日，掃羅王來食飯，
25 照常坐在偎壁个座位。押尼珥坐在佢塍頭，約拿單坐在佢對面，大衛坐个凳仔空空。
26 總係該日掃羅無講麼介，因為佢恅到大衛一定係堵到使佢無淨浰个事情。
27 第二日，就係初二，大衛坐个凳仔還係空空；掃羅就問厥孻仔約拿單：「做麼介耶西个孻仔昨晡日㧯今晡日無來食飯？」
28 約拿單應講：「佢向𠊎請假，求𠊎俾佢轉去伯利恆。
29 佢對𠊎講：『請俾𠊎轉去，因為𠊎等全家愛在城肚獻祭；吾哥喊𠊎一定愛到。若係你係𠊎个朋友，就俾𠊎轉去看吾屋下个人。』所以大衛無來㧯王共下食飯。」
30 掃羅對約拿單大發譴，罵佢講：「你這畜牲，就像若姆恁頑固恁悖逆！𠊎這下正知你係企在耶西个孻仔該片，瀉自家㧯若姆个面皮！
31 敢講你毋知，耶西个孻仔無死，你就永遠毋使想愛做這國家个王？去將佢捉來交給𠊎。佢無死做毋得！」
32 約拿單對厥爸掃羅講：「佢做麼介該死？佢做差麼介事？」
33 掃羅黏時擎起佢个槍，向約拿單㧹過去，愛㓾佢。約拿單這下正知厥爸正經想愛㓾大衛。
34 約拿單氣噴噴對桌席企起來，一日無食東西，該日係初二。約拿單為大衛个事當愁，因為厥爸侮辱大衛。
35 第二朝晨，約拿單帶等一個細阿哥仔，照先前約好个時間到田肚去見大衛。
36 約拿單對細阿哥仔講：「你去尋𠊎射出去个箭。」該細阿哥仔就去。約拿單射一支箭，落在細阿哥仔頭前。
37 當細阿哥仔會到箭跌落个所在，約拿單對佢喊講：「箭還在頭前！」
38 約拿單又對細阿哥仔喊講：「毋好企在該位，遽遽過去！」細阿哥仔將箭拈起來，拿還主人，
39 完全毋知該兜話有麼介意思，只有約拿單㧯大衛知。
40 約拿單將弓箭交給細阿哥仔，喊佢先帶轉城肚去。
41 細阿哥仔離開以後，大衛對石堆後背出來，跪落去，伏在地上拜佢三擺。佢兩儕緊唚緊噭，大衛比約拿單還較悲傷。
42 約拿單對大衛講：「做你平安去！上主一定會使你㧯𠊎並𫣆兩儕个後代，永遠遵守𠊎等中間个誓約。」所以大衛就離開；約拿單也轉城肚去。