1 Samuel 2
1 哈娜祈禱講：上主使𠊎心肝充滿歡喜；上主使𠊎頭那擎到高高。𠊎向𠊎个敵人開嘴大笑，因為上帝救𠊎，使𠊎快樂。
2 只有上主係神聖个；除佢以外無別個神，唯有上帝係保護𠊎等个磐石。
3 你等个講話毋好恁驕傲；你等毋好像癲仔講狂話。因為上主真知一切；佢係審判人个上帝。
4 勇士个弓被人拗斷；軟弱个人變做強壯。
5 有錢人反轉為到食勞碌；無好食个人毋會再肚飢。毋會𫱔个𡜵娘𫱔七個；當會𫱔个卻喪掉子女。
6 上主能使人死，也能使人生；佢使人落陰間，也使人返生。
7 佢使人貧窮，也使人富足；佢使人卑微，也使人尊貴。
8 佢對泥粉中高升窮苦人；佢對糞堆肚牽起困苦人。佢使佢等㧯王子做朋友，使佢等坐大位盡有面子。地个根基係上主所立个；佢在地个頂高建立世界。
9 上主看顧忠心子民个腳步；邪惡个人會在烏暗中消滅。人無辦法靠自家个力量來贏。
10 上主愛除滅自家个仇敵；佢愛用雷公將佢等打死。上主愛審判全世界。佢愛賜能力給佢所立个王，使自家膏油設立个王得勝。
11 後來，以利加拿轉拉瑪去了；細阿哥仔撒母耳就留在示羅，在祭司以利个教導之下事奉上主。
12 以利个兩個孻仔係鱸鰻仔。佢等藐視上主，
13 毋守祭司取祭肉个規定。在人獻祭个時，佢等常常派僕人帶等三齒叉去，肉還在鑊頭肚煮，
14 僕人就將三齒叉插落去，插到麼介，拿出來就算係祭司个。佢等恁樣對待所有來示羅獻祭个以色列人。
15 毋單淨恁樣，甚至牲儀个油還吂燒以前，祭司个僕人就來，對獻祭个人講：「給𠊎一垤肉，𠊎愛拿去給祭司焙。佢無愛煮過个，生肉佢正愛。」
16 若係該人應講：「照規定愛先將油燒掉，然後正做得由在你拿！」祭司个僕人就會講：「做毋得，𠊎這下就愛！若係毋給𠊎，𠊎就愛用搶！」
17 在上主看來，以利這兩個孻仔个罪惡係非常嚴重，因為佢等毋尊重獻給上主个祭物。
18 該時，撒母耳還細；佢著麻紗个以弗得聖服事奉上主。
19 厥姆逐年為佢做一領細長衫，跈老公去獻年祭个時帶給佢。
20 以利逐擺祝福以利加拿㧯厥𡜵娘，對佢講：「願上主通過你个𡜵娘，再賜給你子女，來代你獻給上主个這個孻仔。」然後，佢等就轉屋下去。
21 上主賜福哈娜；姖又𫱔三個孻仔，兩個妹仔。細阿哥仔撒母耳事奉上主，緊來緊大。
22 以利已經當老。佢聽到佢兩個孻仔對以色列人个種種壞行為，佢等甚至㧯該兜在聖帳篷門前工作个婦女睡。
23 以利對佢等講：「你等樣般做這種事呢？大家都將你等所做个壞事㧯𠊎講。
24 吾孻仔啊，做毋得恁樣！在上主子民當中，流傳盡多你等个壞名聲！
25 若係有人得罪別人，還有上帝為佢講話；總係人得罪上主，麼人能為佢講話呢？」佢等毋聽阿爸个話，因為上帝已經決定愛㓾佢等。
26 細阿哥仔撒母耳緊來緊大，上主㧯人當惜佢。
27 有一個神人來見以利，將上主个話㧯佢講：「你个祖先亞倫家族做埃及王奴才个時，𠊎識向佢啟示。
28 𠊎對以色列所有支族當中，選出佢个家族做𠊎个祭司，使佢等在祭壇前服事𠊎，向𠊎燒香，又著以弗得聖服求問𠊎。𠊎還給佢等有權利好分祭壇頂燒獻个祭肉。
29 你等做麼介看輕𠊎要求𠊎子民个獻祭㧯牲儀呢？以利，你做麼介看重若孻仔高過看重𠊎，准佢等將𠊎个子民以色列所獻牲儀中最好个部份拿去畜肥自家呢？
30 𠊎—上主、以色列个上帝識應許你个家族㧯你个宗族會永遠做祭司事奉𠊎。總係，𠊎這下愛廢除你等个職位！尊重𠊎个，𠊎一定看重佢等；藐視𠊎个，𠊎一定看輕佢等。
31 看啊！時節快到了，𠊎愛使你家族㧯你宗族中个後生人短命，無人長壽。
32 你一定會煩勞，嫉妒𠊎給其他以色列人个福氣。你个家庭毋會再有人食到老。
33 𠊎會保留一個後代給你，使佢做祭司事奉𠊎，總係佢會使你青盲、絕望。你所有其他个後代全部會無好死。
34 你兩個孻仔何弗尼㧯非尼哈會共日死掉；這就係對你顯示𠊎所講个話全部會實現个證據。
35 𠊎愛選一個祭司，佢會對𠊎忠心，照𠊎个心意做事。𠊎愛堅固佢个家庭；佢會永遠在𠊎膏油設立个君王面前服事。
36 你个後代中留下來个人會向該祭司求乞、討食，為到過日仔來要求做祭司个助理。」