1 Samuel 15
1 撒母耳對掃羅講：「上主派𠊎用油膏你，立你做佢子民以色列个王。所以，你愛聽上主个話。
2 上主—萬軍个元帥愛責罰亞瑪力人，因為以色列人對埃及出來个時，亞瑪力人个祖先樣般對待佢等、樣般阻擋佢等。
3 這下你愛去攻打亞瑪力人，毀滅佢等所有个一切，毋好留下一項東西；愛將佢等个男人、婦人家、細人仔、孲𤘅仔、牛羊、駱駝㧯驢仔㓾淨淨。」
4 掃羅就在提鍊召集並點算佢个軍隊：對以色列來个有二十萬步兵，對猶大來个有一萬人。
5 掃羅帶領佢个軍隊到亞瑪力城，在山壢肚埋伏。
6 掃羅派人警告基尼人講：「你等離開亞瑪力人到別位去，免得𠊎連你等共下㓾掉；因為以色列人對埃及出來个時，你等个祖先識好款待佢等。」所以基尼人就離開亞瑪力人。
7 掃羅打贏亞瑪力人，對哈腓拉一直打到埃及東片个書珥，
8 生生捉到亞瑪力王亞甲，㓾掉所有个人民。
9 總係掃羅㧯佢个軍隊留下亞甲个性命，乜無㓾掉該兜最好个牛群、羊群、細牛仔㧯細羊仔，其他好个東西也全部留等，毋肯滅掉。佢等單淨毀滅掉該兜無用个㧯無價值个東西。
10 上主對撒母耳講：
11 「𠊎後悔立掃羅做王；佢已經離開𠊎，無遵守𠊎个命令。」撒母耳就盡難過，歸暗晡向上主哀求。
12 第二日打早，撒母耳去尋掃羅。佢聽講掃羅已經到迦密，在該位為自家起一座紀念碑，又向吉甲去了。
13 撒母耳就去見掃羅。掃羅向佢問安講：「願上主賜福給你！上主个命令𠊎已經遵守了。」
14 撒母耳講：「恁樣，𠊎做麼介還聽到牛羊个噭聲？」
15 掃羅應講：「這係𠊎个軍隊對亞瑪力人該位捉來个。佢等留下最好个牛羊，愛獻給上主—你个上帝。其他个，𠊎等全部滅淨淨了。」
16 撒母耳對掃羅講：「恬恬！𠊎愛㧯你講上主昨暗晡對𠊎講个話。」掃羅講：「請講！」
17 撒母耳講：「雖然你恅到自家無重要，總係你係以色列各支族个領袖！上主膏油立你做以色列个王；
18 上主派你去，命令你消滅該兜邪惡个亞瑪力人，將佢等全部㓾淨淨。
19 你做麼介毋聽上主个命令、恁遽去搶戰利品、行上主看做邪惡个事？」
20 掃羅講：「總係𠊎有聽從上主个話！𠊎照上主个吩咐去相㓾、捉到亞瑪力王亞甲，又將所有个亞瑪力人㓾淨淨。
21 𠊎个軍隊無將捉來該兜最好个牛羊㓾掉，反轉愛在吉甲獻給上主—你个上帝。」
22 撒母耳講：「上主歡喜燒化祭㧯平安祭，抑係較歡喜人聽從佢个話？聽從命令比獻祭較好；順從贏過羊牯个脂油。
23 悖逆佢㧯行邪術共樣壞；傲慢㧯拜偶像共樣有罪。因為你違背上主个命令，佢豁掉你，無愛你做王了。」
24 掃羅對撒母耳講：「𠊎有罪了；𠊎違背上主个命令㧯你个指示。因為𠊎驚人民，所以聽從佢等个話去做。
25 這下，𠊎懇求你赦免𠊎个罪，㧯𠊎共下轉去，𠊎正好敬拜上主。」
26 撒母耳應講：「𠊎毋㧯你共下轉去。因為你違背上主个命令，佢也豁掉你，無愛你做以色列个王了。」
27 撒母耳轉身愛走，掃羅挷等佢外衫个衫尾，將衫尾挷斷掉。
28 撒母耳對佢講：「像恁樣，今晡日上主已經使以色列國㧯你斷絕，搶轉來，賜給一個比你較好个人。
29 以色列个榮耀者—上帝毋會講花撩，也毋會改變主意；佢毋係世間人，佢毋會改變主意。」
30 掃羅講：「𠊎有罪了。總係，請你至少在人民該兜長老㧯所有以色列人面前給𠊎多少面子，請㧯𠊎共下轉去，𠊎正好敬拜上主—你个上帝。」
31 所以，撒母耳㧯佢共下轉去。掃羅就敬拜上主。
32 撒母耳講：「將亞瑪力王亞甲帶到𠊎這位來！」亞甲歡歡喜喜來到撒母耳面前，心肚想：「死个苦難一定過去了！」
33 撒母耳講：「你个刀識使盡多阿姆喪失子女，這下若姆也一定會失掉孻仔。」撒母耳就在吉甲祭壇、上主个面前將亞甲斬死。
34 後來，撒母耳轉拉瑪去；掃羅也轉基比亞个屋下去。
35 對該時起，撒母耳一直到死無再去看掃羅，總係佢為掃羅悲傷。上主後悔立掃羅做以色列个王。