1 Samuel 14
1 有一日，約拿單對代佢拿武器个後生侍衛講：「𠊎等偷偷過去該片，入去非利士人个駐防營！」總係佢無㧯厥爸掃羅講。
2 這時掃羅堵好在基比亞城外，停留在米磯崙个一頭石榴樹下。跈佢个大約有六百人。
3 在佢等中間有祭司亞希亞，著等以弗得。(佢係以迦博个兄弟亞希突个孻仔。亞希突係非尼哈个孻仔，係在示羅做上主个祭司以利个孫仔。)無人知約拿單離開營地。
4 約拿單愛偷偷入去非利士人个駐防營，一定愛經過密抹出入个路口。路口兩片有兩座鋸仔形个大巖石，一座喊做播薛，一座喊做西尼；
5 一座在路口北片向密抹，一座在路口南片向迦巴。
6 約拿單對佢个後生侍衛講：「來啊，𠊎等偷偷入去該兜無受割禮个人个駐防營！可能上主會幫助𠊎等。若係佢幫助𠊎等，麼人能抵擋𠊎等呢？不管𠊎等人數幾多，佢一定會使𠊎等打贏。」
7 該侍衛應講：「無論你想做麼介，𠊎定著會跈等你去！」
8 約拿單講：「好！𠊎等過去，故意俾非利士人看到𠊎等。
9 若係佢等喊𠊎等留在這位等佢等過來，𠊎等就在這位等。
10 若係佢等喊𠊎等過去，𠊎等就去；該就係上主愛俾𠊎等打贏个記號了。」
11 所以，佢兩儕故意俾非利士个駐防兵看到。非利士人講：「你看，有希伯來人對佢等囥个孔肚出來了！」
12 佢等就對約拿單㧯該侍衛喊講：「你等過來啊，𠊎等有事㧯你等講哦！」約拿單對佢个侍衛講：「跈等𠊎上去！上主已經將佢等交給以色列人了。」
13 約拿單爬上出入个路口；佢个侍衛跈等佢。約拿單將非利士人打到橫笐橫袋；侍衛就跈等來將佢等㓾掉。
14 這第一擺个攻擊，約拿單㧯佢个侍衛就在四分之一公頃闊个所在，㓾掉二十儕左右。
15 所有在營地並田野个非利士人全部非常著驚；駐防兵㧯攻擊个軍隊也全部愊愊掣；地也震動，佢等驚到無葛無煞！
16 掃羅个守望兵在便雅憫地區个基比亞看到非利士人驚到相爭逃走。
17 掃羅就對跈佢个人講：「去點算軍隊，看麼人無在！」佢等查出約拿單㧯佢个侍衛無在。
18 掃羅對祭司亞希亞講：「將上帝个約櫃扛過來！」(該時，上帝个約櫃在以色列人中間。)
19 掃羅當對祭司講話个時，非利士軍營越來越亂；掃羅對祭司講：「𠊎等來毋掣求問上主了！」
20 所以掃羅帶領部隊來到戰場；佢等就看到非利士人亂到繷交交，互相殘殺。
21 頭擺投靠非利士人个希伯來人，就係一直在佢等營肚个希伯來人，這下轉過來參加掃羅㧯約拿單个以色列軍隊。
22 該兜囥在以法蓮山區个以色列人聽到非利士人逃走了，也全部出來追殺佢等，
23 一直打到伯‧亞文該片。恁樣，該日上主就救到以色列人。
24 該日，以色列人又𤸁又肚飢，因為掃羅識在人民面前發誓講：「今晡日，在𠊎向敵人報仇以前麼人食東西，麼人就受咒詛。」所以，歸日無人敢食東西。
25 該樣時，樹林肚連地泥也有蜂糖。
26 人民進入樹林，看到蜂糖流下來，總係無人敢伸手拿來食，因為大家驚掃羅所發个誓。
27 總係約拿單無聽到厥爸在人民面前所發个誓，所以伸出柺棍仔，插入一隻蜂藪肚，搵蜂糖來食。佢黏時感覺加盡有精神。
28 有人㧯佢講：「𠊎等又𤸁又肚飢，總係若爸警告𠊎等講：『今晡日麼人食東西，麼人就受咒詛。』」
29 約拿單講：「吾爸所發个誓盡無理、害到大家！你看，𠊎食這一些仔蜂糖，感覺加盡有精神！
30 打贏敵人後，食搶來个食物，正會精神百倍，㓾死更多个非利士人啊！」
31 該日，以色列人打贏非利士人，對密抹一直打到亞雅崙。這時，以色列人全部痶到手軟腳攋；
32 佢等黏時對戰利品當中牽出牛羊㧯細牛仔，當場就㓾，肉還帶血就拿來食。
33 有人向掃羅報告講：「看哪，人民食帶血个肉，得罪上主了！」掃羅講：「你等有罪了！遽遽輾一隻大石頭到𠊎這位來！」
34 掃羅又下令講：「到人民該位㧯佢等講，逐儕愛將佢等个牛羊逐過來，在這位㓾來食；總係做毋得食帶血个肉得罪上主。」所以，該暗晡，人民將佢等个牛羊逐過來，在該位㓾。
35 掃羅為上主起一座祭壇；這係佢所起个第一座壇。
36 掃羅對佢个部下講：「𠊎等今暗晡下去攻打非利士人，搶佢等个東西，直到天光，將佢等㓾淨淨！」佢等應講：「你認為妥當，就恁樣去做！」總係祭司講：「𠊎等應當先求問上帝！」
37 所以掃羅求問上帝：「𠊎應該下去攻打非利士人麼？你會將佢等交在以色列人手中麼？」總係該日上帝無應佢。
38 掃羅就對人民該兜領袖講：「到這位來，調查今晡日𠊎等犯麼介罪。
39 𠊎指等永生上主—以色列个救主發誓：犯罪个人一定愛處死；就算係𠊎个孻仔約拿單也共樣愛死。」總係無一儕敢出聲。
40 所以掃羅對以色列人民講：「你等企在該位；𠊎㧯吾孻仔約拿單企在這位。」人民對掃羅講：「你認為妥當，就恁樣去做！」
41 掃羅向上主—以色列个上帝講：「今晡日你樣毋應你个僕人呢？上主—以色列个上帝啊，若係罪在𠊎抑係吾孻仔約拿單，請用烏陵應𠊎；若係罪在你个子民以色列人，請用土明應𠊎。」結果抽出來个係約拿單㧯掃羅；人民全部無事。
42 掃羅講：「再抽籤，看係𠊎，抑係吾孻仔約拿單？」結果抽出約拿單。
43 所以掃羅問佢：「你做麼介事啊？」約拿單應講：「𠊎用柺棍仔搵一些仔蜂糖食。𠊎在這位，𠊎甘願死！」
44 掃羅講：「約拿單哪，若係你無死，願上帝㓾掉𠊎！」
45 總係人民對掃羅講：「約拿單為以色列贏到偉大个勝利，敢好俾佢死？做毋得！𠊎等指等永生上主發誓：動佢一條頭那毛也做毋得。佢今晡日所做个係靠上帝个幫助。」恁樣，人民救到約拿單，俾佢毋使死。
46 掃羅無再追殺非利士人；非利士人就轉自家个所在去了。
47 掃羅堅固以色列个王位以後，常常去攻打四周圍个仇敵：佢㧯摩押人、亞捫人、以東人、瑣巴該兜王，以及非利士人相㓾。無論佢去到㖠位全部打贏。
48 掃羅相㓾非常勇敢，甚至打贏亞瑪力人。佢救以色列人脫離所有欺負佢等个外族人。
49 掃羅个孻仔有約拿單、亦施韋、麥基‧舒亞。佢个長女安到米拉，第二個妹仔安到米甲。
50 掃羅个𡜵娘安到亞希暖，係亞希瑪斯个妹仔。佢軍隊个元帥係厥叔尼珥个孻仔押尼珥。
51 掃羅个阿爸基士㧯押尼珥个阿爸尼珥全部係亞別个孻仔。
52 掃羅一生人㧯非利士人常常有激烈个戰爭，所以佢一發現有勇敢強壯个人，就喊佢等來跈佢。