1 Kings 3
1 所羅門㧯埃及王結盟，討埃及王个妹仔做𡜵娘。佢吂起自家住个王宮、上主个聖殿㧯耶路撒冷周圍个城牆以前，佢一直俾埃及公主住在大衛城肚。
2 上主个聖殿還吂起个時，人民在山岡頂獻祭。
3 所羅門敬愛上主，照厥爸大衛个訓示行事，總係佢還係在逐位山岡頂獻祭燒香。
4 有一擺，所羅門王到基遍獻祭，因為該山岡頂个祭壇係最出名个。佢在該位獻一千隻燒化祭。
5 該暗晡，上主在夢中向佢顯現，問佢：「你愛求𠊎賜給你麼介？」
6 所羅門應講：「你一直用偉大个慈愛款待你个僕人—吾爸大衛，因為佢對你忠心、誠實、有正直个心。到這下，你還係用這種偉大个慈愛款待佢，賜給佢一個孻仔今晡日坐在佢个王位。
7 上主—𠊎个上帝啊，雖然僕人還後生，毋知樣般治理國家，總係你俾𠊎承接吾爸大衛做王。
8 僕人在你所揀選个人民當中做王；佢等个人數多到無法度算。
9 所以，求你賜給僕人有智慧，使𠊎有能力為佢等斷是非、分好壞；若無，𠊎樣般做得統治你恁多个人民？」
10 主上帝歡喜所羅門个祈求，
11 就對佢講：「因為你無為自家求長壽、求財富、抑係求消滅敵人，反轉求斷是非个智慧，會用公義治理人民，
12 所以𠊎愛照你所求个給你。𠊎愛賜給你聰明智慧；這係以前个人所無个，以後个人也毋會再有。
13 你無求个，𠊎也愛賜給你；你一生享受个榮華富貴，在列王中無一個做得㧯你比。
14 你若順從𠊎，遵行𠊎个法律㧯誡命，像若爸大衛共樣，𠊎會賜給你長壽。」
15 所羅門睡醒，知上帝在夢中向佢講話。所以佢到耶路撒冷去，企在上主个約櫃前，獻燒化祭㧯平安祭，然後擺筵席款待佢所有个官員。
16 有一日，有兩個妓女來見所羅門王，企在佢面前。
17 一個講：「吾主啊，這婦人家㧯𠊎共下住在一間屋肚；𠊎在屋下𫱔細人仔个時，姖也在該位。
18 𠊎𫱔一個細孻仔；兩日後姖也𫱔一個細孻仔。這屋肚只有𠊎兩儕，無別人。
19 有一暗晡，姖無注意，卻磧死自家个細人仔。
20 姖就半夜䟘起來，在𠊎當好睡个時對吾身邊揇走𠊎个孻仔，放在姖个胸前，然後將姖死掉个細人仔放在𠊎胸前。
21 第二朝晨，𠊎䟘起來愛給細人仔食乳，發現佢已經死掉；𠊎詳細看，原來這個毋係𠊎𫱔个細人仔。」
22 另外一個婦人家講：「毋著！還生个細人仔係𠊎个，死个正係你个！」第一個婦人家應講：「毋著！死个細人仔係你个，還生个正係𠊎个！」姖等在王面前就恁樣吵來吵去。
23 所羅門王心肚想：「姖等兩儕全部講還生个細人仔係自家个，死个係對方个。」
24 所以佢講：「拿刀仔來！」部下就將刀仔拿來。
25 王下令講：「將這還生个細人仔剖做兩析，一析給這婦人家，一析給該婦人家。」
26 該還生个細人仔个阿姆因為惜自家个孻仔，就對王講：「吾主啊，千萬毋好㓾這細人仔！求你將佢交給該婦人家好了！」總係另外一個婦人家講：「毋使給𠊎，也毋好給姖，將這細人仔剖做兩析！」
27 所羅門王講：「毋好㓾這細人仔！將佢交給第一個婦人家，因為姖正係細人仔个阿姆。」
28 以色列人民聽到所羅門王恁樣个決裁，全部當佩服佢；因為佢等知上帝賜給佢智慧，有能力審判案仔。