1 Kings 22
1 以色列㧯敘利亞兩年零無戰爭，
2 總係在第三年中，猶大王約沙法去見以色列王亞哈。
3 以色列王對佢个官員講：「𠊎等做麼介毋出手對敘利亞王該位將基列个拉末搶轉來呢？該本來係𠊎等个啊！」
4 亞哈問約沙法：「你肯㧯𠊎共下去攻打基列个拉末麼？」約沙法對以色列王講：「你个事就係𠊎个事！𠊎个部下就係你个部下，𠊎个戰馬也係你个戰馬。」
5 約沙法又講：「總係，你愛先求問上主！」
6 所以，以色列王召集大約四百名先知來，問佢等：「𠊎做得去攻打基列个拉末麼？」佢等講：「做你去！主會使王得勝。」
7 總係約沙法講：「這位敢毋係還有上主个先知？𠊎等做得請佢求問上主。」
8 以色列王對約沙法講：「還有一個，係音拉个孻仔米該雅，𠊎等做得通過佢求問上主。毋過𠊎當惱佢，因為佢從來毋識對𠊎預言講一句好話，總係預言講災禍个話。」約沙法講：「王毋好恁樣講！」
9 所以，以色列王喊一個宮廷官員來，命令佢黏時去將音拉个孻仔米該雅尋來。
10 以色列王亞哈㧯猶大王約沙法著等王袍，在撒馬利亞城門外打麥場該位，坐在自家个寶座頂；所有个先知在佢等面前受感入神講預言。
11 其中有一個先知係基拿拿个孻仔西底家；佢打兜鐵角，對亞哈講：「上主恁樣講：『你愛用這兜鐵角打敘利亞人，徹底消滅佢等。』」
12 其他个先知也全部恁樣預言講：「做你去攻打基列个拉末，你一定會贏；上主會將該城交在王个手中。」
13 這時，該去喊米該雅來个官員對米該雅講：「所有个先知全部講王會成功，你最好也恁樣講。」
14 總係米該雅講：「𠊎指等永生个上主發誓，上主對𠊎講麼介，𠊎就講麼介。」
15 米該雅到亞哈王面前个時，王問佢：「米該雅，𠊎等做得去攻打基列个拉末麼？」米該雅應講：「做你去打啊！你一定會打贏；上主會將該城交在王个手中！」
16 總係王對佢講：「你愛奉上主个名照實對𠊎講！這句話𠊎愛㧯你講幾多擺呢？」
17 米該雅講：「𠊎看到以色列个軍隊散在山岡頂，就像無牧人个羊群。上主講：『這兜人無領袖，喊佢等平平安安轉屋下去！』」
18 以色列王對約沙法講：「𠊎敢毋係講過，佢從來毋識對𠊎預言講一句好話？總係預言講災禍个話！」
19 米該雅繼續講：「好！你愛聽上主个話！𠊎看到上主坐在天庭个寶座，所有个天使企在佢个塍頭。
20 上主問：『麼人去騙亞哈，俾佢到基列个拉末去送死呢？』該兜天使一儕講一樣。
21 後來，有一個靈到上主頭前來講：『𠊎去騙佢。』上主問：『你愛樣般騙呢？』
22 該靈講：『𠊎會使亞哈所有个先知講花撩。』上主講：『好！你去騙佢！你一定會成功。』」
23 最後米該雅講：「這就係事情个經過。上主使你个先知對你講花撩。上主已經命定你堵到災禍！」
24 基拿拿个孻仔西底家先知行到米該雅面前，打佢个嘴角，責問佢：「上主个靈麼介時節離開𠊎，㧯你講話呢？」
25 米該雅應講：「等到你走去最底背个細房間囥起來，該日你就會知了。」
26 然後，以色列王命令一個官員：「將米該雅捉起來，送到市長亞們㧯王子約阿施該位，
27 吩咐佢等將米該雅關在監獄肚，逐日單淨給佢維持生命个餅㧯水，等到𠊎平安轉來。」
28 米該雅講：「若係你還平安轉來，這就證明上主無通過𠊎講話！」佢又講：「各位，愛記得𠊎頭下所講个話！」
29 以色列王亞哈㧯猶大王約沙法去基列攻打拉末城。
30 以色列王對約沙法講：「𠊎等上戰場个時，𠊎來改裝，你還係著等王袍。」所以以色列王改裝去相㓾。
31 敘利亞王命令三十二個戰車指揮官，愛專門打以色列王一儕。
32 所以當佢等看到約沙法个時，恅到佢就係以色列王，就全部去攻打佢。約沙法大聲喊，
33 佢等認出佢毋係以色列王，就無繼續去逐佢。
34 總係，有一個敘利亞士兵隨便射一箭，堵好射到以色列王亞哈戰甲个接縫。亞哈對駛車个喊講：「𠊎著重傷了，倒轉去，退出戰場！」
35 該時，戰爭越來越厲害，有人扶等亞哈王企在戰車肚，面對敘利亞人，血對傷口流出，流到滿車。臨暗仔个時，佢就死掉。
36 日頭落山个時，有一個命令傳遍以色列軍營：「全部轉自家个屋下，轉自家个故鄉！」
37 亞哈王就恁樣死掉。有人將佢个屍體搬到撒馬利亞，葬在該位；
38 佢等在撒馬利亞个陂塘，妓女洗身个所在，將佢个戰車洗淨。就像上主識講過个，狗仔來舐佢个血。
39 亞哈其他个事，包含佢造象牙王宮㧯起盡多城市个經過，全部記在《以色列列王史》底背。
40 亞哈死後，厥孻仔亞哈謝承接佢做王。
41 以色列王亞哈在位个第四年，亞撒个孻仔約沙法做猶大王。
42 約沙法做王个時三十五歲。佢在耶路撒冷統治二十五年。厥姆係示利希个妹仔阿蘇巴。
43 約沙法像厥爸亞撒共樣，行正直个事，行上主看做著个事。總係，佢無廢掉山岡頂个神廟；人民還係在該位獻祭燒香。
44 約沙法也㧯以色列王和平相處。
45 約沙法其他个事，佢个勇敢㧯佢樣般作戰，全部記在《猶大列王史》底背。
46 佢除掉厥爸亞撒時代留下來所有在神廟活動个男娼。
47 該時以東地方無王，猶大王指派一個總督在該位治理。
48 約沙法做一隊个大船，愛去俄斐載金仔；總係無去，因為船在以旬‧迦別全部壞掉。
49 後來亞哈个孻仔亞哈謝提議，俾佢个僕人㧯約沙法个僕人共下坐船去；總係約沙法毋肯。
50 約沙法死後，葬在大衛城个王室墳墓肚。厥孻仔約何蘭承接佢做王。
51 猶大王約沙法在位个第十七年，亞哈个孻仔亞哈謝做以色列王。佢在撒馬利亞統治兩年。
52 佢行上主看做邪惡个事，學厥爸亞哈、厥姆耶洗碧、㧯尼八个孻仔耶羅波安个壞模樣，害以色列人陷在罪中。
53 佢像厥爸共樣，服事、敬拜巴力，惹上主—以色列个上帝發譴。