1 Corinthians 7
1 這下來討論你等信仔底背所提个事情。𠊎同意，男人能莫結婚係好事。
2 總係，既然有恁多淫亂个事發生，男人應該有自家个𡜵娘；女人也應該有自家个老公。
3 老公對𡜵娘愛盡夫妻个責任；𡜵娘對老公也愛盡夫妻个責任。
4 𡜵娘對自家个身體並無主權，主權係在老公；共樣，老公對自家个身體也無主權，主權係在𡜵娘。
5 夫妻做毋得忽略對方个需要，除非係愛專心祈禱个緣故，彼此同意暫時分房；總係後來還係愛恢復正常个關係，免得你等因為無法度節制，受撒但个誘惑。
6 𠊎恁樣講，毋係命令你等，係勉強同意你等个看法定定。
7 事實上，𠊎願意大家像𠊎恁樣莫結婚；總係，逐儕對上帝所領受个恩賜無共樣，有人个恩賜係這樣，有人係該樣。
8 這下，𠊎愛對無結婚个人㧯寡婦講：能像𠊎恁樣過獨身个生活也好。
9 總係，你等若無法度控制情慾，就結婚好了。結婚比慾火難捱較好。
10 已經結婚个人，𠊎也愛吩咐你等；其實這毋係𠊎个意思，係主个命令：做𡜵娘个毋好離開老公；
11 若係離開，就毋好再嫁；若無，就愛倒轉來同老公和好。做老公个也做毋得離掉𡜵娘。
12 對其他个人，𠊎也有話愛講(毋係主講个)：老公係基督徒，總係𡜵娘無信主，厥𡜵娘若歡喜繼續同佢共下生活，佢就做毋得離掉𡜵娘。
13 𡜵娘係基督徒，總係老公無信主，厥老公若歡喜繼續同姖共下生活，姖也做毋得離掉老公。
14 因為，無信主个老公因為𡜵娘信主，已經得到上帝个接納；共樣，無信主个𡜵娘因為老公信主，已經得到上帝个接納。若毋係恁樣，佢等个子女樣般有可能得到接納呢？事實上，佢等係上帝所接納个。
15 萬一，無信主个堅持愛離開，就由在佢去。只有在這種情形之下，信主个，無論係做老公个抑係做𡜵娘个，正做得自由。因為上帝呼召你等，係愛你等有和平。
16 信主个𡜵娘人啊，你樣般敢確定無法度救若老公啊？信主个男仔人啊，你樣般敢確定無法度救若𡜵娘啊？
17 每一個人愛照主个恩賜來生活，也愛配合上帝呼召佢个目的。這係𠊎在各教會教導人个原則。
18 已經受割禮个，蒙召以後毋使除掉割禮个記號；蒙召个時吂受割禮个，也毋使受割禮。
19 因為有受割禮抑係無，毋算麼介；重要个係服從上帝个命令。
20 每一個人應該保持佢蒙召个時个身份。
21 你蒙召个時个身份若係奴隸，也無相干；總係，一有機會好得到自由，你就愛爭取。
22 因為奴隸蒙主呼召就係主所釋放个人；共樣，自由人蒙召就係基督个奴隸。
23 你等係上帝用重價買來个，所以毋好做人个奴隸。
24 兄弟姊妹啊，你等每一個人，在上帝面前，全部愛保持蒙召該時个身份。
25 關係獨身个問題，𠊎無得到主个指示。總係，𠊎得到上帝个憐憫，成做堪得信賴个人；𠊎就用這種身份來對各位提出𠊎个看法。
26 想到目前个艱難，𠊎認為人最好還係保持原狀。
27 人若有𡜵娘，毋好想愛脫離；若無𡜵娘，也無需要去尋一個。
28 你若結婚，並毋係犯罪；吂嫁个婦女若結婚，乜無麼介毋著。總係，結婚个人有肉身个纏絆；𠊎希望你等毋使像佢等恁樣。
29 兄弟姊妹啊，𠊎所愛講个就係：時間毋多了。從今以後，有𡜵娘个，愛像無𡜵娘；
30 噭吱个，愛像無噭；歡喜个，愛像毋歡喜；盡好買个，愛像無半樣；
31 好插世事个，愛像無插。因為這世界个樣像會過掉了。
32 𠊎希望你等全無掛慮。男人無結婚係關心主个事，專心來想樣般俾主歡喜；
33 總係，結婚个人就係關心世間个事，想辦法俾𡜵娘歡喜，
34 難免分心。無老公㧯守獨身个婦女所關心个係主个事；因為姖願意奉獻自家个身心靈；總係，做人𡜵娘个就係關心世間个事，想辦法俾老公歡喜。
35 𠊎恁樣講，係愛幫助你等，毋係愛限制你等。𠊎个目的係愛你等行合適个事，為主个工作完全奉獻自家，全無保留。
36 論到該已經定親，後來卻決定毋結婚个人，男人若感覺自家對不起未婚妻，為到性慾个需要，自認結婚較著，佢等就應當結婚；恁樣行，毋算犯罪。
37 總係，一個男人若係佢个心非常堅定毋結婚，(毋係人壓迫佢，係佢自家決心愛恁樣行)，又能節制自家，在這種情形之下，無同未婚妻結婚就係好事。
38 總講，同未婚妻結婚係好事；堅持毋結婚還較好。
39 老公還在，做𡜵娘个係受約束个；老公若過身，姖就有自由好同合意个男人結婚，總係愛嫁信徒正做得。
40 照𠊎看，姖莫嫁人較有福氣；𠊎也想，這係上帝个靈指示𠊎个。