1 Chronicles 22
1 所以大衛講：「主上帝个聖殿會起在這位；這位係以色列人民獻燒化祭个所在。」
2 大衛命令所有住在以色列个外國人聚集共下，派佢等當中个打石師傅預備石頭起上帝个聖殿。
3 大衛供應盡多个鐵仔，用來做門扇个釘仔㧯鉤仔，又供應盡多个銅仔，多到無法度秤。
4 大衛又供應算毋出个香柏樹，因為泰爾㧯西頓个人民運來盡多香柏樹給佢。
5 大衛想：「𠊎个孻仔所羅門為上主起个聖殿一定愛非常靚，世界有名。總係佢還後生，又無經驗；𠊎一定愛將一切預備好勢。」所以大衛在吂死以前準備當多材料。
6 大衛喊厥孻仔所羅門來，交帶佢為上主—以色列个上帝起聖殿。
7 大衛對佢講：「孻仔啊，𠊎本來心肝想為上主—𠊎上帝个名起聖殿，
8 總係上主對𠊎講，因為𠊎識㓾過盡多人，打當多戰爭，流盡多人个血，佢無愛𠊎為佢个名起聖殿。
9 總係佢給𠊎一隻應許。佢講：『你會有一個孻仔。佢統治个期間國泰民安；因為𠊎愛賜給佢平安个日仔，毋受敵人攪躁。佢个名愛喊做所羅門；因為在佢做王个期間，𠊎愛賜給以色列人和平安全。
10 佢愛為𠊎个名起聖殿。佢愛做𠊎个孻仔；𠊎愛做佢个阿爸。𠊎愛堅固佢个王位，永遠統治以色列。』」
11 大衛繼續講：「孻仔啊，願上主—你个上帝㧯你共下；照佢應許你个，使你順利來為佢起聖殿。
12 願上主—你个上帝賜給你聰明智慧，有辦法照佢个法律治理以色列。
13 若係你認真遵行上主通過摩西頒佈給以色列所有个法律誡命，你就會成功。你愛堅強勇敢；毋好驚，也毋好失志。
14 起聖殿个材料，𠊎已經盡力準備好金仔三千四百公噸，銀仔三萬四千公噸，另外還有盡多銅㧯鐵，多到無法度秤。𠊎也預備好木材㧯石頭，總係你還愛準備加兜。
15 你有盡多師傅，就係打石師傅、泥水師傅、㧯木匠師傅，還有各種工作个師傅，
16 會用金、銀、銅、鐵鑄造東西。這下就好開始，願上主㧯你共下。」
17 大衛命令以色列所有个領袖幫助厥孻仔所羅門。
18 佢講：「上主—你等个上帝一直㧯你等共下，賜給你等四周圍平安。佢使𠊎征服以前住在這地方所有个民族。這兜民族這下全部歸順在上主㧯佢个子民面前。
19 這下你等愛全心全意事奉上主—你等个上帝；愛開始起主上帝个聖殿。聖殿起好以後，你等正有所在好將上主个約櫃㧯所有敬拜上帝个聖物放在底背。」