Ezekiel 10— pcm

¹I look on-top di creatures wey dey alive kon si sometin wey bi like throne wey dem make with safaya.

²So God tell di man wey wear linen sey, “Go under di wheel make yu pak shako full hand kon go pour am for di town.” So, I look am as e dey go.

³As di man go inside, di creatures stand face di sout-side for di temple and kloud kon full inside di kourtyard.

⁴God glory kon raiz-up from di creatures and E move go di temple gate. Den kloud full di temple and di kourt kon dey shine, bikos of di lite.

⁵Pipol wey dey outside di kourtyard dey hear di nois wey di creatures feada dey make and e bi like sey na Oga God dey tok.

⁶Wen God sey make di man wey wear linen go take fire from under di wheel, di man go inside go stand near one of di wheel.

⁷One among di creatures kon put en hand inside di fire, pak some shako, den e put am for di man hand. Di man take di shako kon komot der.

⁸I si sey di creatures get sometin wey bi like human being hand under dia feada.

⁹I still si sey dem get four wheel wey bi like each oda and each wheel dey near en creature.

¹⁰And wen I look dem well: di four wheel resemble each oda like sey dem get wheel inside dia wheel.

¹¹Di creatures fit go anywhere without sey dem turn. Dem dey go di direcshon wey dem like without sey dem turn.

¹²Eyes dey evriwhere for dia body, back, hand, feada and wheel.

¹³I hear as dem dey koll dia wheel, “O wheel.”

¹⁴Each creature get four face. Di first one face na, angel own, di sekond one, na human being own, di third one, na lion own and di fourt one, na eagle own.

¹⁵(Dem bi di same creature wey I si for Chebar River.) Wen di creature get up

¹⁶kon move, di wheel follow dem. Even wen dem won fly, di wheel dey follow dem fly too.

¹⁷Wen dem stop, di wheel stop too and wen di creature fly again, di wheel follow dem, bikos na di creatures dey kontrol di wheel.

¹⁸Den God glory komot from di temple gate kon go where high pass where di creatures dey.

¹⁹Dem spread dia feada kon fly komot di eart and I dey look as di wheel follow dem. Dem stop for di east gate for di temple and Israel God glory kon kover dem.

²⁰I si dem as di same creatures wey I bin si under Israel God for Chebar River. I know sey dem bi angel.

²¹Each of dem get four face, four feada and sometin wey bi like human being hand, dey under dia feada.

²²Dia face just bi like di face wey I si for Chebar River. Each creature just dey waka strait dey go.