Genesis 6— NO2011NN

¹No tok menneska til å bli mange på jorda, og dei hadde fått døtrer.

²Då såg gudesønene at menneskedøtrene var vakre, og dei tok nokre av dei til koner, dei som dei helst ville ha.

³HERREN sa: «Min ande skal ikkje for alltid bli verande i menneska, for dei er av kjøt og blod. Levetida deira skal vera 120 år.»

⁴Det var kjemper på jorda i dei dagane, og sidan òg. For gudesønene gjekk inn til menneskedøtrene, som fødde dei born. Dette er dei mektige frå eldgammal tid, dei namngjetne.

⁵HERREN såg at vondskapen til menneska var stor på jorda, for alt dei ville og planla i hjartet, var vondt, dagen lang.

⁶Då angra HERREN at han hadde laga menneske på jorda, og han var full av sorg i hjartet.

⁷Og HERREN sa: «Eg vil utrydda menneska som eg har skapt, frå jorda, alt frå menneska til feet, krypdyra og fuglane under himmelen. For eg angrar at eg har laga dei.»

⁸Men Noah fann nåde for HERRENS auge.

⁹Dette er slektshistoria til Noah. Noah var ein rettferdig mann, ein heiderleg mann i si tid. Noah vandra med Gud.

¹⁰Han fekk tre søner: Sem, Ham og Jafet.

¹¹Men jorda vart forderva for Guds andlet. Ho vart full av vald.

¹²Gud såg på jorda, og sjå, ho hadde vorte forderva, for alt det som menneska hadde gjort på jorda, førte til øydelegging.

¹³Då sa Gud til Noah: «Eg vil gjera ende på alt kjøt og blod. For jorda har vorte full av vald på grunn av dei, og sjå, eg vil øydeleggja dei saman med jorda.

¹⁴Lag deg ei ark av gofertre. Du skal laga fleire små rom i arka og tjørebre henne innvendig og utvendig.

¹⁵Slik skal du byggja arka: Ho skal vera 300 alner lang, 50 alner brei og 30 alner høg.

¹⁶Du skal laga ei opning for dagslyset og avslutta opninga ei alen frå toppen av arka. Du skal setja døra til arka på den eine sida og så laga eit nedre, eit andre og eit tredje dekk.

¹⁷No vil eg la storflaumen koma over jorda og utrydda alt kjøt og blod, alt som det er livsande i under himmelen. Alt som er på jorda, skal omkoma.

¹⁸Men med deg vil eg oppretta ei pakt. Du skal gå inn i arka, du og sønene dine og kona di og svigerdøtrene med deg.

¹⁹Av alt levande, alt kjøt og blod, skal du føra to av kvart slag inn i arka, så dei bergar livet saman med deg. Hann og ho skal dei vera.

²⁰Av alle slag fuglar og alt slag fe og alle slag kryp på marka skal to av kvart slag koma inn til deg, så dei kan berga livet.

²¹Du skal ta noko av alt som er etande, og samla det hos deg. Det skal du og dei andre ha å eta.»

²²Og Noah gjorde dette. Han gjorde alt det som Gud hadde pålagt han.