Revelation 9— 2006

¹Затруби и петтиот ангел, и видов ѕвезда како падна од небото на земјата. И ѝ беше даден клучот од кла­де­не­цот на бездната;

²па го отвори кладенецот на бездната, и од кладенецот излезе дим како дим од голема печка; сонцето и воздухот по­темнеа од димот на изворот.

³И од димот се појавија скакулци по земјата, и им се даде власт, каква што имаат земните скорпии.

⁴И им се рече да не ја повредуваат тревата по земјата, ниту какво и да би­ло зеленило, ниту некое дрво, а само оние луѓе, кои немаат печат Божји на челата свои.

⁵И им се даде не да ги убиваат, туку само да ги мачат пет месеци; и ма­че­ње­то нивно беше како мачење од скорпија, кога ќе касне човек.

⁶Во тие дни луѓето ќе ја бараат смртта, но нема да ја најдат; ќе посакаат да умрат, но смртта ќе бега од нив.

⁷По својот облик скакулците личеа на коњи приготвени за војна: на главите нивни имаше нешто слично на златни венци, а лицата им беа како лица човеч­ки;

⁸имаа коси како косите на жени, а забите им беа како заби на лавови.

⁹И имаа оклопи како оклопи од же­лезо; а шумот на нивните крилја беше како шум на коли со многу коњи кога трчаат во војна.

¹⁰Имаа, пак, опашки како скорпиите, а на опашките осила и им беше дадена сила да им пакостат на луѓето пет месеци.

¹¹И за цар над себе го имаа ангелот на бездната; името негово по еврејски е Авадон, а по грчки — Аполион.

¹²Едното зло помина, еве идат уште две зла по него.

¹³И шестиот ангел затруби, и чув еден глас од четирите рога на златниот жртвеник, што е пред Бога,

¹⁴кој му зборуваше на шестиот ангел, кај кого беше трубата: „Ослободи ги четирите ангели, врзани кај големата река Еуфрат!“

¹⁵И беа одврзани четирите ангели, кои беа приготвени за часот и денот, за месецот и годината, за да убијат една третина од луѓето.

¹⁶Бројот на коњаниците беше двесте милиони — го чув нивниот број.

¹⁷И така во видение ги видов коњите и оние кои јаваа на нив, што имаа оклопи огнени и синкасти и сулфурни. Главите на коњите личеа на глави од лавови, а од устата нивна излегуваше оган, дим и сулфур.

¹⁸А од тие три зла — огнот, димот и сулфурот, што излегуваа од нивната уста, умре една третина од луѓето,

¹⁹бидејќи нивната сила беше во нивната уста, а опашките нивни, што личеа на змии, имаа глави со кои пустошеа.

²⁰А другите луѓе, што не загинаа од тие зла, не се покајаа за делата на ра­цете свои, та да не се поклонуваат ни на ѓаволи ни на идоли златни и сребрени, бронзени, камени и дрвени, кои не можат ниту да гледаат, ниту да слу­ша­ат, ниту, пак, да одат;

²¹и не се покајаа ни за убиствата свои, ниту, пак, за вражбите свои, ниту за блудството свое, ниту за кражбите свои.