Revelation 6— 2006

¹И видов кога Јагнето скрши еден од седумте печати, и чув едно од че­ти­рите животни кое проговори како со глас на грмотевица: „Дојди и види!“

²И видов, ете, бел коњ, и на него ја­вач со лак; и Му беше даден венец, и тој излезе како победник, за да победи.

³А кога го извади вториот печат, го чув како проговори второто животно: „Дојди и гледај!“

⁴И излезе друг коњ, црвен; и на ја­ва­чот му беше дадено да го одземе мирот од земјата, та еден со друг да се убива­ат; и му беше даден голем меч.

⁵А кога се отвори третиот печат, чув како проговори третото животно: „Дојди и види!“ И видов, ете вран коњ, а на него јавач со мерила во раката своја.

⁶И чув глас сред четирите животни, кој зборуваше: „Шиник пченица за де­нариј, и три шиника јачмен за денариј; а растителното масло и виното ќе ги не­ма!“

⁷И кога се раскрши четвртиот печат, го чув гласот на четвртото животно кое рече: „Дојди и гледај!“

⁸И видов. И ете сив коњ, а на него јавач, чие име беше смрт; и адот врвеше по него, и му се даде власт над четвртина од земјата — да убива со меч и глад, со помор и земни ѕверови.

⁹А кога го симна петтиот печат, под жртвеникот ги видов душите заклани заради словото Божјо и за сведоштвото, што го имаа

¹⁰и викаа со висок глас, велејќи: „До кога, Севишен, свети и вистинити, нема да судиш и да им се одмаздуваш за нашата крв на оние што живеат на земјата?“

¹¹И на секого од нив им се дадоа бели облеки, и им се рече да починат уште малку време, додека не се дополни бројот на нивните сотрудници и браќа, што ќе бидат убиени, како и тие.

¹²И видов, кога се крена шестиот печат. И, ете, настана голем земјотрес, и сонцето стана црно како вреќа од кострет, и месечината стана како крв;

¹³ѕвездите, пак, небесни паднаа на земјата, како што смоквата лулана од силен ветар, ги исфрла пупките свои;

¹⁴и небото исчезна како свиткана хартија, и секоја гора и секој остров се по­местија од местата свои;

¹⁵и царевите земни, и благородни­ци­те, и богатите, и војводите, и силните, и секој роб и слободен се скрија во пеш­те­ри и горски камењари,

¹⁶велејќи им на планините и на кар­пите: „Паднете врз нас и скријте нѐ од лицето на Оној Кој седи на престолот и од гневот на Јагнето,

¹⁷зашто дојде големиот ден на Неговиот гнев, и кој може да опстане?“