Psalms 72— 2006

¹Боже, дај му го на царот Својот пра­веден суд, а на царевиот син — Својата праведност,

²за да им суди со праведност на Твои­те луѓе и на сиромасите Твои со праведен суд.

³Горите нека им донесат мир на луѓето, и ритчињата — праведност.

⁴Нека ги брани бедните меѓу луѓето, нека ги спаси синовите на сиромасите, а угнетувачот нека го понизи.

⁵Нека живее, додека постои сонцето и месечината — од род во род.

⁶Нека биде како дожд на ливада, како капки што наросуваат земја.

⁷Во Негово време нека се зацари правда, и нека има изобилен мир сѐ до­дека не ја снема месечината.

⁸И нека владее од море до море и од Реката до краиштата на Земјата.

⁹Пред Него нека паднат на колена жителите на пустината, и непријатели­те Негови нека ја лижат прашината;

¹⁰царевите на Тарсис и островјаните дарови нека му принесуваат; и царевите на Сава и Сева дарови нека му донесуваат.

¹¹И нека Му се поклонуваат сите цареви; нека Му служат сите народи;

¹²зашто Тој избави беден кога вика и сиромав и беспомошен.

¹³Ќе го поштеди бедниот и сиромавиот и ќе го спаси животот на сиро­масите;

¹⁴од угнетувања и насилства ќе ги избави душите нивни, бидејќи е скапо­цена нивната крв пред очите Негови.

¹⁵Нека поживее, па ќе Му даваат арабиско злато; и нека Му се молат непрес­тајно, секој ден нека Го благословуваат;

¹⁶Нека има на земјата жито во изобилство, до врвовите на горите; плодот Негов ќе се издига над Ливан, а во градовите луѓето нека се размножуваат како тревата по земјата,

¹⁷Неговото име нека биде вечно: нека Му трае славата сѐ додека постои Сон­цето; и во Него нека бидат благосло­вени сите земни племиња, а и сите на­роди нека Го сметаат за блажен.

¹⁸Нека е благословен Господ Бог, Бог Израелов, Кој единствен прави чудеса;

¹⁹и нека е благословено Неговото славно име довека, и со славата Негова нека се исполни целата Земја! Амин и амин!

²⁰Завршија молитвите на Давид, Је­сеевиот син.