Psalms 31— 2006

¹Кај Тебе, Господи, се засолнувам, о да не се посрамам никогаш; според пра­ведноста Своја спаси ме.

²Приклони го увото Твое кон мене, побрзај да ме избавиш. Биди ми Бог заштитник и прибежиште за да се спа­сам.

³Зашто Ти си карпа моја и крепост моја, заради името Твое поведи ме и управувај со мене.

⁴Изведи ме од оваа стапица, која потајно ми ја поставија, зашто Ти си мој заштитник.

⁵Во Твоите раце го предавам духот свој; Ти си ме откупил, Господи, Боже на вистината.

⁶Не ти се мили оние што почитуваат ништожни идоли, но јас имам верба во Господ.

⁷Ќе се радувам и ќе се веселам поради Твојата милост, зашто Ти погледна на маката моја и ја спаси од патила ду­шата моја,

⁸и не ме предаде во рацете на непријателите мои; нозете мои ми ги постави на чистина.

⁹Смилувај се кон мене, Господи, заш­то сум потиштен од скрб: ми се исушија од тага окото мое, душата моја и утробата моја.

¹⁰Го минувам во жал животот мој, и годините мои — со воздишки; изнеможе силата моја, и коските мои се свиткаа.

¹¹Пред сите непријатели мои станав за прекор, дури и пред соседите мои, а и плашило за познатите мои; оние што ќе ме видат на улица, бегаат од мене.

¹²Заборавен како мртовец сум во ср­цата на луѓето; станав како скршен сад,

¹³бидејќи чув дека мнозина околу мене погубно шепотат, и кога ќе се соберат заедно, се договораат и душата моја да ми ја одземат.

¹⁴Јас, пак, имам верба во Тебе, Господи, и велам: Ти си мој Бог.

¹⁵Дните мои се во Твоите раце; изба­ви ме од рацете на непријателите мои и од гонителите мои.

¹⁶Нека засветли лицето Твое над слугата Твој; спаси ме поради Твојата ми­лост.

¹⁷Господи, не допуштај да се посрамам, поради тоа што кон Тебе пови­кав; нечестивите нека се посрамат и нека замолкнат во светот на мртвите.

¹⁸Да онемеат лажливите усти, што говорат лошо против праведниот со горделивост и презир.

¹⁹Колку е голема добрината Твоја, Господи, што си ја запазил за оние, кои имаат страхопочит кон Тебе, и што си ја приготвил за оние, кои имаат верба во Тебе пред очите на синовите чо­вечки!

²⁰Ќе ги сокриеш под покривот на лицето Свое од човечките завери, ќе ги заклониш од нападите на јазиците противнички.

²¹Нека е благословен Господ, зашто ја пројави кон мене Својата чудесна милост кога бев обиколен како град под опсада!

²²Во малодушноста своја си реков: отфрлен сум од очите Твои; но Ти го слушна гласот на молитвата моја, кога повикав кон Тебе.

²³Љубете Го Господа сите светии Негови, зашто Господ ги чува верните Свои, а им отплатува на оние, кои гордо постапуваат.

²⁴Бидете силни и нека крепне срцето ваше, сите вие што имате верба во Господ!