Numbers 4
1 И им рече Господ на Мојсеј и на Арон, велејќи:
2 „Пребројте ги Каатовите синови меѓу синовите Левиеви според родовите нивни и според семејствата нивни,
3 од триесет години и нагоре до педесет години, способни за служба, за да ги вршат сите работи во скинијата на собранието.
4 А ова е службата на Каатовите синови во скинијата на собранието: да ја носат Најсветата Светиња.
5 Кога ќе треба да се крене на пат, Арон и синовите негови да влезат и да ја симнат покривната завеса и да го покријат со неа ковчегот на заветот
6 и да го покријат со покровот од скапоцени кожи, и над него да ја стават покривката цела од синкаво ленено платно, и да ги постават носилата.
7 И трпезата за приносните лебови да ја покријат со синкаво ленено платно и да ги наредат одозгора чиниите, и лажиците, и чашите, и потирите; а на неа секогаш да има лебови;
8 да стават врз нив црвена покривка, да ја покријат со покривало од скапоцена кожа и да ѝ ги постават лостовите за носење.
9 Да земат исто така сина покривка, и да го покријат свеќникот за осветлување, и кандилцата негови, и подлошките негови, и сите садови за масло, со кои се служат,
10 да го обвијат него и сите негови прибори со покривка од скапоцени кожи и да го стават на неговата носилка.
11 А на златниот жртвеник да стават покривка од синкаво платно, да го покријат со покривка од скапоцени кожи, и да ги постават неговите лостови за носење.
12 Да го земат сиот прибор за служење, со кој служат во светилиштето, да го обвијат во синкаво платно, да го покријат со покривка од скапоцени кожи, и да го постават на неговата носилка.
13 Да го очистат жртвеникот од пепелта и да го обвијат со пурпурно платно;
14 да го стават одозгора сиот прибор негов, со кој се служат при него — мангалите, виљушките, лопатките и чашите — сиот прибор на жртвеникот, и да го покријат со покривка од скапоцени кожи и да го постават на неговите лостови за носење.
15 И кога ќе направат така, Арон и синовите негови, покривајќи го целото светилиште и сите негови работи, па кога ќе се крева населбата, тогаш Каатовите синови да влезат и да носат; но тие не смеат да се допираат до светите работи, за да не умрат. Тие работи од скинијата на собранието да ги носат Каатовите синови.
16 На Елеазар, синот на свештеникот Арон, му се доверува маслото за светилникот, благомиризливата смеса за кадење, постојаниот лебен принос и маслото за помазание — му се доверува целата скинија и сѐ што е во неа, светилиштето и она што му припаѓа нему.“
17 И им рече Господ на Мојсеј и на Арон, велејќи:
18 „Не погубувајте го родот на Каатовците меѓу левитите,
19 туку еве што ќе направите за нив, за да бидат живи и да не умрат, кога ќе пристапат кон Светињата над светињите: Арон и синовите негови нека дојдат и нека му определат на секого од нив кој што ќе работи и што ќе носи:
20 но тие не смеат да се доближуваат и да ја видат светињата кога ја покриваат, за да не умрат.“
21 И му рече Господ на Мојсеј, велејќи:
22 „Преброј ги и Гирсоновите синови според семејствата нивни и според родовите нивни,
23 од триесет години нагоре до педесет години, пребројте ги сите способни за служба и за работа во скинијата на собранието.
24 Еве ја работата на Гирсоновиот род, кога ќе служат и кога ќе носат:
25 да ги носат платништата на скинијата, и скинијата на собранието со покривот нејзин, и покривката од скапоцени кожи што е на неа, и завесата од влезот во скинијата на собранието,
26 платништата околу дворот и завесата од влезот во дворот што се околу скинијата и жртвеникот, со јажињата и другите нивни принадлежности; и сѐ околу ова што треба да се работи, нека го работат.
27 Сите служби на Гирсоновите синови, кога носат товари и кога вршат работа, треба да се извршуваат по заповед на Арон и на синовите негови; ним доверете им го и чувањето на она што ќе го носат.
28 Тоа се службите на родовите на Гирсоновите синови во скинијата на собранието и тоа е она што треба да го чуваат под надзор на Итамар, синот на свештеникот Арон.
29 Преброј ги Мерариевите синови според родовите нивни и според семејствата нивни;
30 од триесет години нагоре до педесет години, преброј ги сите способни за служба, за да работат во скинијата на собранието.
31 Еве што треба да носат тие според службата своја во скинијата на собранието: штиците од скинијата и напречните греди нејзини, столбовите нејзини и подножјата нивни,
32 и столбовите од сите страни на дворот и подножјата нивни, и клиновите нивни и јажињата нивни, и сиот прибор што им припаѓа; и именувајте ги работите што треба да ги носат.
33 Тоа е работата на родовите на Мерариевите синови според службата нивна при скинијата на собранието, а под надзор на Итамар, синот на свештеникот Арон.“
34 И ги преброија Мојсеј и Арон и началниците народни Каатовите синови според родовите нивни и според семејствата нивни,
35 од триесет години нагоре до педесет години, сите способни за служба, за да работат во скинијата на собранието.
36 И излегоа на број според родовите нивни, две илјади седумстотини и педесет.
37 Тоа се преброените од родовите Каатови, сите што ќе служат при скинијата на собранието, и што ги изброија Мојсеј и Арон по заповед Господова, дадена преку Мојсеј.
38 И Гирсоновите синови беа преброени според родовите нивни, и според семејствата нивни,
39 од триесет години и нагоре до педесет години, сите способни за служба, за да работат во скинијата на собранието;
40 и излегоа на број, според родовите нивни, според семејствата нивни, две илјади шестотини и триесет.
41 Тоа се изброените од родовите на Гирсоновите синови, сите што ќе служат во скинијата на собранието, а кои ги изброија Мојсеј и Арон, по заповедта Господова, дадена преку Мојсеј.
42 Родовите на Мерариевите синови беа изброени според родовите нивни, според семејствата нивни,
43 од триесет години и нагоре, до педесет години, сите способни за служба, да работат при скинијата на собранието;
44 и излегоа на број, според родовите нивни, три илјади и двесте.
45 Тоа се преброените од родовите на Мерариевите синови што ги преброија Мојсеј и Арон по заповедта Господова, дадени преку Мојсеј.
46 И беа изброени сите левити што ги изброија Мојсеј и Арон и началниците израелски според родовите нивни и според семејствата нивни,
47 од триесет години и нагоре до педесет години, сите способни да работат и да носат во скинијата на собранието,
48 и излегоа на број осум илјади петстотини и осумдесет.
49 По заповед на Господ ги распореди Мојсеј, секој на својата работа што ќе ја врши, и беа изброени, како што му заповеда Господ на Мојсеј.