2 Samuel 8— 2006

¹Потоа Давид ги нападна Филистејците и ги покори; и ја одзеде Давид превласта во регионот од рацете на Филистејците.

²Ги порази и Моавците и ги измери со јажиња, откако ги легна на земја: измери две јажиња за убивање, едно јаже за оставање живи. И Моавците му станаа робје на Давид и му плаќаа данок.

³Давид го порази Адраазар, син на Рехов, цар на Цова, кога тој одеше да ја прошири власта своја кај реката Еуфрат;

⁴и зеде Давид од него илјада и седумстотини коњаници и дваесет илјади пешаци; и им ги пресече Давид жилите на сите колски коњи, оста­вајќи од нив само за сто коли.

⁵Дојдоа Арамејци од Дамаск да му помогнат на цовашкиот цар Адраа­зар; но Давид уби дваесет и две илјади Арамејци.

⁶Тогаш Давид постави стражи во Арам кај Дамаск, и Арамејците му станаа на Давид робови и му плаќаа данок. А Господ го чуваше Давид на­секаде, каде ќе отидеше тој.

⁷Потоа Давид ги зеде златните грив­ни што ги носеа слугите на Адраазар, и ги донесе во Ерусалим.

⁸А од Бетах и Беротаи, Адраазаро­вите градови, цар Давид зеде многу бакар.

⁹Кога Тои, царот на Хамат, чу дека Давид ја поразил целата војска на Адраазар,

¹⁰Тои го испрати синот свој Јорам кај царот Давид да го поздрави и да му благодари, поради тоа што војувал против Адраазар и го поразил; бидеј­ќи Адраазар војуваше со Тои. А во рацете Јорам имаше сребрени, златни и бакар­ни садови.

¹¹Цар Давид ги посвети и нив на Господ, заедно со среброто и златото, запленето од сите народи, кои ги беше покорил:

¹²од Арам, Моав, синовите Анонови, Филистејците и Амаликиј­ците, и од пленот на Адраазар, синот на цовашки­от цар Рехов.

¹³И Давид се прослави, враќајќи се по поразот на осумнаесет илјади Арамејци во Солената Долина.

¹⁴Тој постави стражи во Едом; пос­тави стражи по цел Едом; и сите Едом­ци му станаа на Давид робови. И Господ го чуваше Давид, каде и да отидеше тој.

¹⁵Така царуваше Давид над сите Израелци, судеше и делеше правда на сиот свој народ.

¹⁶А Јоав, синот на Саруја, беше над војската; а Јосафат, синот Ахилудов, беше летописец;

¹⁷Садок, синот Ахитувов и Ахиме­лех, синот Авијатаров, беа свештеници; Сераја беше писар;

¹⁸а Бенајаху, синот Јодаев, беше за­поведник над Керетијците и Пеле­тијците, а Давидовите синови беа свеш­теници.