Exodus 24— 1990

¹И му рече Бог на Мојсеја: »Качи се при Господа ти и Арон, Надав и Авиуд и седумдесетте старешини Израилеви и поклонете Му се оддалеку на Господа;

²и да пристапи Мојсеј сам до Господа, но тие, пак, да не пристапуваат, и народот со нив да не се искачува.«

³Дојде Мојсеј и му ги повтори на народот сите зборови Божји и сите заповеди. И сиот народ одговори во еден глас, и рече: »Сите зборови што ги кажал Господ ќе ги помниме и ќе слушаме.«

⁴И ги напиша Мојсеј сите зборови Господови, па станувајќи утредента рано, подигна жртвеник под гората, и дванаесет столбови за дванаесетте Израилеви племиња,

⁵и прати младичи од синовите Израилеви, и тие принесоа жртви сепаленици и жртви мирни на Господа Бога.

⁶Потоа Мојсеј зеде половина од крвта и ја налеа во чаша, а другата половина од крвта ја изли на жртвеникот;

⁷па ја зеде книгата на заветот и му ја прочита гласно на народот, а тие рекоа: »Сѐ, што рекол Господ, ќе правиме и ќе бидеме послушни.«

⁸Тогаш Мојсеј ја зеде крвта, и го попрска со неа народот, велејќи: »Ова е крвта на заветот, кој го постави Господ со вас за сите оние зборови.«

⁹И се искачија потоа Мојсеј и Арон, Надав и Авиуд, и седумдесетте старешини Израилеви горе

¹⁰и го видоа местото каде што стоеше Бог Израилев; а подножјето Негово како да беше од Камен сафир, со сјај како сводот небески по чистота.

¹¹И не се повреди никој од избраните меѓу синовите Израилеви: тие Го видоа местото на Бога, па јадеа и пиеја.

¹²И му рече Господ на Мојсеја: »Качи се при Мене на гората и остани тука; ќе ти дадам камени плочи со закон и заповеди, што ги напишав за да им бидат закон.«

¹³Тогаш стана Мојсеј со Исуса, неговиот помошник, и се искачија на гората Божја,

¹⁴а на старешините им рекоа: »Почекајте тука во молчење додека се вратиме при вас; а, ете, Арон и Ор се со нас, па, ако има некој нешто за судење, нека оди при нив.«

¹⁵И се искачи Мојсеј на гората, а облак ја покри планината,

¹⁶и беше слава Господова на гората Синајска; и облак ја покриваше шест дена; а во седмиот ден го повика Мојсеја пред облакот.

¹⁷А славата Господова се гледаше како оган што гори на врвот од гората пред синовите Израилеви.

¹⁸И Мојсеј влезе среде облакот и се качи на гората; и остана таму Мојсеј четириесет дена и четириесет ноќи.