1 John 5— 1990

¹Секој, кој верува дека Исус е Христос, од Бога е роден, и секој, кој Го сака Оној, Кој родил, Го сака и Оној, Кој е роден од Него.

²По тоа познаваме дека ги сакаме чедата Божји, кога Го сакаме Бога и ги пазиме Неговите заповеди.

³Бидејќи љубовта кон Бога се состои во тоа: да ги пазиме заповедите Негови. А Неговите заповеди не се тешки.

⁴Оти секој, кој е роден од Бога, го победува светот; и ова е победата што го победи светот – верата наша.

⁵Кој го победува светот, ако не оној, кој верува дека Исус е Син Божји?

⁶Исус Христос е Оној, Кој дојде преку вода и крв и преку Духот, – не само преку вода, туку преку вода и крв; и Духот е Оној, Кој сведочи, оти Духот е вистина.

⁷Зашто Троица се, Кои сведочат на небото: Отецот, Словото и Светиот Дух; и Троица се едно.

⁸И Троица се, Кои сведочат на земјата: Духот, водата и крвта; и Троица сведочат заедно.

⁹Ако го примаме човечкото сведоштво, Божјото сведоштво е поголемо, бидејќи тоа е сведоштво Божјо, со кое Бог посведочи за Својот Син.

¹⁰Кој верува во Синот Божји, тој има сведоштво во себе; кој не Му верува на Бога, Го прави лажец, оти не поверувал во сведоштвото Негово, со кое посведочил Бог за Својот Син.

¹¹А сведоштвото е тоа дека Бог ни дарувал живот вечен; и тој живот е во Неговиот Син.

¹²Кој Го има Синот Божји, тој го има и тој живот; кој Го нема Синот Божји, го нема тој живот.

¹³Ова ви го напишав вам, кои верувате во името на Синот Божји, за да знаете дека имате живот вечен и да верувате во името на Синот Божји.

¹⁴И тоа е слободата, која ја имате пред Него, дека ако просиме нешто по Неговата волја, Он нѐ послушува.

¹⁵А кога знаеме дека нѐ услишува што и да побараме, знаеме дека ќе добиеме, што и да сме побарале од Него.

¹⁶Ако некој го види брата си да греши со грев не за смрт, нека се моли, и Бог ќе му даде живот, – односно на оној што греши не за смрт. Постои грев за смрт: за тој грев не велам да се моли.

¹⁷Секоја неправда е грев, но има грев не за смрт.

¹⁸Знаеме дека секој роден од Бога не греши: но родениот од Бога се пази, и лукавиот не се допира до него.

¹⁹Знаеме дека ние сме од Бога, и дека целиот свет лежи во зло.

²⁰Знаеме исто така дека Синот Божји дојде и ни даде светлина, и разум, за да Го познаеме вистинскиот Бог; и ние пребиваме во вистинскиот Бог – Неговиот Син Исус Христос. Он е вистински Бог и живот вечен.

²¹Чеда, пазете се од идолите. Амин!