Psalms 43
1 Դպրապետին՝ Կորխի որդիների՝ սաղմոս իմաստության
2 Ո՛վ Աստված, մեր ականջներով լսեցինք, Ինչ որ մեր հայրերը պատմեցին մեզ. Այն գործը, որ կատարեցիր նրանց օրերում, առաջին օրերում։
3 Քո ձեռքը վերացրեց հեթանոսներին Եվ նրանց փոխարեն հաստատեց մեր հայրերին։ Չարչարեցիր ժողովուրդներին և դուրս հանեցիր նրանց.
4 Ո՛չ իրենց սրով ժառանգեցին երկիրը, Ո՛չ էլ իրենց բազուկը փրկեց իրենց, Այլ քո աջը, քո բազուկն ու քո երեսի լույսը, Քանզի սիրեցիր նրանց։
5 Դու ինքդ ես իմ թագավորը և իմ Աստվածը, Որ տնօրինեցիր Հակոբի փրկությունները։
6 Քեզնով պիտի հարվածենք մեր թշնամիներին Եվ քո անվամբ պիտի արհամարհենք մեր դեմ ելնողներին։
7 Ո՛չ աղեղիս վրա եմ հույս դրել, Եվ ո՛չ էլ սուրս պիտի փրկի ինձ,
8 Այլ դու ես մեր թշնամիներից մեզ փրկողը Եվ մեզ ատողներին ամոթահար անողը։
9 Ամեն օր Աստծով պարծենանք Եվ նրա անվանը խոստովանենք հավիտյան։
10 Բայց արդ մերժեցիր և անարգեցիր մեզ Եվ չելար մեր զորքի հետ, ո՛վ Աստված։
11 Մեզ թիկունք դարձնել տվեցիր մեր թշնամիների առաջ, Եվ մեզ ատողները հափշտակեցին մեզ։
12 Մեզ ոչխարի պես տվեցիր մորթվելու Եվ մեզ հեթանոսների մեջ ցրեցիր։
13 Առանց գնի վաճառեցիր քո ժողովրդին, Եվ մեր աղաղակն այժմ թիվ-համար չունի։
14 Մեզ մեր հարևանների նախատինքը դարձրիր Եվ մեր դրացիների ծաղր ու ծանակը։
15 Մեզ հեթանոսների մեջ ասելիք դարձրիր, Եվ ժողովուրդները մեր մասին լսելիս գլուխներն էին շարժում։
16 Ամեն օր նախատինքներս իմ առջև են, Եվ երեսիս ամոթը պատել է ինձ
17 Նախատողի ու չարախոսի ձայնից, Թշնամու և հալածողի երեսից։
18 Այս ամենը մեր գլխով անցավ, Բայց մենք քեզ չմոռացանք Ու չդրժեցինք քո Ուխտը,
19 Եվ մեր սրտերը չփոխվեցին։ Մեր շավիղները շեղեցիր քո ճանապարհներից,
20 Մեզ խոնարհեցրիր չարչարանքի տեղերում, Եվ մեզ պատեցին ստվերները մահվան։
21 Մի՞թե մոռացանք մեր Աստծու անունը Կամ ձեռք մեկնեցինք օտար աստվածներին։
22 Սակայն Աստված այդ կիմանա, Որովհետև նա է քննում մեր սրտի գաղտնիքները։
23 Քանզի ամեն օր մեռնում ենք քեզ համար, Համարվեցինք իբրև զոհաբերության նախատեսված ոչխարներ։
24 Զարթնի՛ր, Տե՜ր, ինչո՞ւ ես ննջում. Ելի՛ր և մի՛ մերժիր մեզ ընդմիշտ։
25 Երեսդ ինչո՞ւ ես շրջում մեզնից, Մեր նեղություններն ու աղքատությունը մոռանում։
26 Մեր անձերը մինչև գետին խոնարհվեցին, Իսկ մեր մեջքերը հողին հավասարվեցին.
27 Ելի՛ր, Տե՜ր, օգնի՛ր մեզ Եվ փրկի՛ր մեզ հանուն քո անվան։