Psalms 32
1 Սաղմոս Դավթի Արդարնե՛ր, ցնծացե՛ք Տիրոջով. Ուղղամիտներին է վայելում օրհնությունը։
2 Օրհներգե՛ք Տիրոջը օրհնությամբ, Տասնալար սաղմոսարանով սաղմո՛ս ասացեք նրան։
3 Օրհնեցե՛ք Տիրոջը նոր օրհնությամբ, որ բարի է. Սաղմո՛ս ասացեք նրան օրհնությամբ։
4 Ուղիղ են Տիրոջ պատգամները, Եվ նրա բոլոր գործերը՝ հուսալի.
5 Տերը սիրում է ողորմություն և իրավունք։ Տիրոջ ողորմությամբ երկիրն իր լրումին հասավ,
6 Եվ Տիրոջ խոսքով հաստատվեց երկինքը, Նրա բերանի շնչով՝ նրա բոլոր զորությունները։
7 Ծովի ջրերը հավաքեց կարծես տիկի մեջ Եվ իր գանձերը դրեց խորքերում։
8 Ամբողջ երկիրը թող սոսկա Տիրոջից, Եվ նրանից թող դողան աշխարհի բոլոր բնակիչները։
9 Քանզի նա ասաց, և գոյացան, հրամայեց, և հաստատվեցին։
10 Տերը ցրում է հեթանոսների ժողովները, Տերն անարգում է ժողովուրդների խորհուրդները, Տերն արհամարհում է իշխանների մտքերը։
11 Տիրոջ խորհուրդը կմնա հավիտյան, Նրա սրտի խորհուրդը՝ սերնդեսերունդ։
12 Երանի՜ այն ազգին, որի օգնականը Տերն է՝ Աստված, Այն ժողովրդին, որին ընտրեց իբրև իրեն ժառանգություն։
13 Տերը երկնքից նայեց մարդկանց բոլոր որդիներին.
14 Իր պատրաստած բնակությունից Նայեց աշխարհի բոլոր բնակիչներին։
15 Նա, որ ստեղծեց նրանցից յուրաքանչյուրի սիրտը Եվ գիտի նրանց բոլոր գործերը։
16 Թագավորն իր զորքի բազմությամբ չի փրկվի, Եվ ոչ էլ հսկան՝ իր մեծ զորությամբ։
17 Ձին չի կարող փրկություն ապահովել, Իր ողջ կարողությամբ չի կարող փրկել հեծյալին։
18 Տիրոջ աչքն իրենից երկյուղածների վրա է, Եվ նրա ողորմությունը իրեն հուսացողների վրա է՝
19 Նրանց փրկելու մահվանից Եվ սովի ժամանակ նրանց կերակրելու։
20 Մեր հոգիներն սպասում են Տիրոջը, Որովհետև մեր օգնականն է ու մեր պաշտպանը։
21 Նրանով թող ուրախանան մեր սրտերը, Եվ նրա սուրբ անվանը հուսանք։
22 Թող քո ողորմությունը մեզ վրա լինի, Ո՜վ Տեր, ինչպես որ քեզ հուսացինք։