Jeremiah 41
1 Պատահեց այնպես, որ յոթերորդ ամսին թագավորազարմ Եղիսամայի որդի Նաթանի որդի Իսմայելը թագավորի ծառաների և տասը մարդու ուղեկցությամբ եկավ Մասեփա՝ Աքիկամի որդի Գոդողիայի մոտ, և նրանք միասին հաց կերան Մասեփայում։
2 Ապա Նաթանի որդի Իսմայելն իր հետ եղած տասը տղամարդկանցով վեր կացավ, սրով հարվածեց Սափանի որդի Աքիկամի որդի Գոդողիային և սպանեց նրան, որին բաբելացիների արքան երկրի վրա վերակացու էր դրել։
3 Բոլոր հրեաներին ևս, որոնք Գոդողիայի հետ Մասեփայում էին, ինչպես նաև այնտեղ գտնված բոլոր քաղդեացիներին, որոնք պատերազմող մարդիկ էին, Իսմայելը կոտորեց։
4 Գոդողիայի սպանության հաջորդ օրը, երբ դեռ ոչ ոք այդ մասին չգիտեր,
5 Սյուքեմից, Սաղեմից և Շամրինից մարդիկ եկան, ութսուն տղամարդ՝ մորուքները սափրած, զգեստները պատառոտած, կոծ անելով, ձեռքներին ընծաներ և կնդրուկ, որպեսզի տանեն Տիրոջ տունը։
6 Մասեփայում նրանց ընդառաջ ելավ Նաթանի որդի Իսմայելը. նա գնում էր ու լաց լինում։ Իսկ երբ մոտեցավ նրանց, ասաց. «Մտե՛ք Աքիկամի որդի Գոդողիայի մոտ»։
7 Հենց որ քաղաքամեջ հասան, Նաթանի որդի Իսմայելն իր հետ եղած մարդկանցով քաղաքի մեջ կոտորեց նրանց և լցրեց ջրհորը։
8 Այնտեղ տասը մարդ կար, որոնք Իսմայելին ասացին. «Մեզ մի՛ սպանիր, որովհետև մենք դաշտում գանձեր ունենք՝ ցորեն ու գարի, մեղր ու յուղ»։ Նա զիջեց, ընկերների միջից միայն նրանց չսպանեց։
9 Իսկ ջրհորը, որի մեջ Իսմայելը լցրել էր այն բոլոր մարդկանց դիակները, որոնց կոտորել էր Գոդողիայի պատճառով, մեծ ջրհոր էր, որը Իսրայելի Բաասա արքայի վախից շինել էր Ասա արքան. Նաթանի որդի Իսմայելն այն լցրեց սպանվածներով։
10 Իսմայելը գերեվարեց Մասեփայում մնացած ամբողջ ժողովրդին և թագավորի դուստրերին՝ Մասեփայում եղած ժողովրդի թափթփուկների հետ միասին, որոնց Նաբուզարդան դահճապետը հանձնել էր Աքիկամի որդի Գոդողիային։ Նաթանի որդի Իսմայելն առավոտ կանուխ ելավ գնաց մյուս կողմը՝ ամովնացիների մոտ։
11 Երբ Կարեի որդի Հովնանը և զորքի բոլոր հրամանատարները, որոնք նրա հետ էին, լսեցին այն բոլոր չարիքների մասին, որ գործել էր Նաթանի որդի Իսմայելը,
12 հավաքեցին իրենց բոլոր զինվորներին և շարժվեցին, որպեսզի գնան ու պատերազմ մղեն Նաթանի որդի Իսմայելի դեմ։ Նրան հանդիպեցին Գաբավոնում՝ հորդ ջրերի մոտ։
13 Իսկ երբ Իսմայելի հետ եղած ամբողջ ժողովուրդը նկատեց Կարեի որդի Հովնանին և բոլոր զորապետներին, որ նրա հետ էին, ուրախացավ։
14 Ամբողջ ժողովուրդը, որին Իսմայելը գերել էր Մասեփայում, անցավ նրանց կողմը, եկավ Կարեի որդի Հովնանի մոտ։
15 Բայց Նաթանի որդի Իսմայելը ութ տղամարդու հետ փրկվեց Հովնանի ձեռքից և ընկավ ամովնացիների մոտ։
16 Ապա Կարեի որդի Հովնանն ու բոլոր զորապետները, որ նրա հետ էին, Մասեփայից վերցրին ժողովրդի այն մասը, որ մնացել էր, ազատեցին նրանց Նաթանի որդի Իսմայելի ձեռքից այն բանից հետո, երբ սա սպանեց Աքիկամի որդի Գոդողիային, գաբավոնացիների երկրից առան հզոր ու պատերազմող մարդկանց, կանանց, տղամարդկանց ու ներքինիներին,
17 գնացին ու կանգ առան Բերութքամամ երկրում, Բեթղեհեմի դիմաց, որպեսզի քաղդեացիների երկյուղից անցնեն գնան եգիպտացիների երկիրը։
18 Նրանք վախենում էին նրանցից, քանի որ Իսմայելն սպանել էր Աքիկամի որդի Գոդողիային, որին բաբելացիների արքան երկրի վրա վերակացու էր կարգել։