Bible

1 Այսպես է ասում Տերը՝ Աստված. «Ներքին գավթի դուռը, որ արևելք է նայում, վեց աշխատանքային օրերին փակ կլինի, իսկ շաբաթ օրը կբացվի։ Ամսագլխի օրն էլ կբացվի։ 2 Իշխանը կմտնի արտաքին կամարի դռնով ու կկանգնի դռան սեմին։ Քահանաները նրա համար ողջակիզում կկատարեն, փրկության զոհ կմատուցեն նրա համար։ Ինքը կերկրպագի դռան սեմին ու դուրս կգա։ Մինչև երեկո դուռը չի փակվի։ 3 Երկրի ժողովուրդն էլ շաբաթ օրերն ու ամսագլուխներին կերկրպագի դռան մուտքի առաջ, Տիրոջ առաջ։ 4 Եվ այն ողջակեզները, որ շաբաթ օրերին իշխանը կմատուցի Տիրոջը, կլինեն առանց արատի վեց գառ և առանց արատի մի խոյ, 5 եփված մաննա՝ խոյի ու գառների հետ, զոհեր ու նվերներ, ինչպես ինքը կկամենար տալ, և մեկ քսեստ յուղ՝ հացի հետ։ 6 Իսկ ամսամուտի օրը կմատուցի առանց արատի մի զվարակ, որ լինի հորթեր ծնած կովի ձագ (վեց գառներն ու խոյն էլ առանց արատի պետք է լինեն)։ 7 Կմատուցի նաև շարմաղ ալյուր՝ զվարակի հետ, շարմաղ ալյուր ու մաննա՝ խոյի ու գառների հետ, ինչպես որ ինքը կկամենար տալ, շարմաղ ալյուրի հետ էլ՝ յուղ։ 8 Իշխանը մտնելիս կամարի դռնով կմտնի, նույն դռնով էլ դուրս կգա։ 9 Իսկ երբ երկրի ժողովուրդը տոներին մտնի Տիրոջ առաջ երկրպագելու, ով հյուսիսային դռնով մտնի, հարավային դռնով դուրս կգա, իսկ ով հարավային դռնով մտնի, հյուսիսային դռնով դուրս կգա։ Չի վերադառնա այն դռնով, որով մտել էր, այլ հակառակ դռնով դուրս կգա։ 10 Իշխանն էլ նրանց մեջ, մտնելիս նրանց հետ կմտնի, ելնելիս էլ նրանց հետ դուրս կգա։ 11 Տոներին ու հանդիսավոր հավաքույթներին եփված մաննա կլինի զվարակի հետ, մաննա՝ խոյի ու գառների հետ, ինչպես ինքը կկամենար տալ. մեկ քսեստ յուղ էլ՝ հացի հետ։ 12 Ապա իշխանը Տիրոջը կմատուցի խոստովանության ու կամավոր փրկության ողջակեզները, իր համար բաց կանի արևելք նայող դուռը և կմատուցի փրկության համար իր ողջակեզները նույն ձևով, ինչպես կատարում էր շաբաթ օրերին։ Ապա դուրս կգա և իր ելնելուց հետո կփակի դռները։ 13 Նա Տիրոջը որպես ողջակեզ կմատուցի առանց արատի մի ամլիկ գառ, և դա կանի ամեն օր՝ վաղ առավոտյան։ 14 Դրա հետ վաղ առավոտյան կմատուցի նաև մաննա արդուի չափի մեկ վեցերորդ մասով և քսեստի մեկ երրորդի չափով յուղ՝ ազնիվ ալյուրին խառնելու համար։ Մաննայի ընծայումը Տիրոջը հավիտենական հրահանգ է. 15 ամեն օր վաղ առավոտյան պետք է մատուցվի գառը, մաննան ու յուղը՝ որպես մշտնջենական ողջակեզ»։ 16 Այսպես է ասում Տերը՝ Աստված. «Եթե իշխանն իր որդիներից որևէ մեկին պարգև տա իր ժառանգությունից, դա նրա որդիների ժառանգական կալվածքը կլինի։ 17 Իսկ եթե իր ժառանգությունից պարգև տա իր ծառաներից մեկին, դա նրանը կլինի մինչև թողության տարին, ապա նորից կվերադարձվի իշխանին։ Բայց նրա որդիների ժառանգությունը նրանցը կլինի։ 18 Իշխանը չպետք է իր ժողովրդի ժառանգությունից վերցնի՝ նրան բռնադատելով, այլ իր կալվածքներից ու իր ժառանգությունից պետք է ավանդ թողնի իր որդիներին, որպեսզի իմ ժողովուրդը չցրվի՝ յուրաքանչյուրն իր բնակավայրից»։ 19 Նա ինձ հարավային դռնով տարավ դեպի քահանաների սուրբ սենյակը, որ հյուսիս է նայում։ Եվ ահա մի առանձնացված տեղ կար։ 20 Նա ասաց ինձ. «Սա է այն տեղը, որտեղ քահանաները եփելու են զոհերի միսը՝ հանցանքների ու մեղքերի թողության համար։ Այնտեղ են եփելու նաև մաննան՝ ժողովրդին սրբագործելու համար ամենևին դուրս չգալով արտաքին գավիթը»։ 21 Նա ինձ դուրս բերեց արտաքին գավիթը, պտտեցրեց գավթի չորսբոլորը։ Ահա տեսա գավիթներ 22 ու գավիթներ՝ սրահի չորս կողմերում։ Փոքր գավիթը քառասուն կանգուն երկարություն և երեսուն կանգուն լայնություն ուներ։ Չորսն էլ մի չափի էին, 23 չորսի շուրջն էլ սենյակներ կային։ Խոհանոցներ էլ կային սենյակի տակ՝ չորս կողմերում։ 24 Նա ինձ ասաց. «Սրանք խոհանոցներ են, որտեղ տաճարի սպասավորները ժողովրդի մատուցած զոհերի միսն են եփում»։