Bible

1 Մեր գերության քսանհինգերորդ տարում՝ առաջին ամսին, ամսվա տասնմեկերորդ օրը, քաղաքի գրավման տասնչորսերորդ տարում, նույն այդ օրը Տիրոջ ձեռքը հանգչեց ինձ վրա։ 2 Աստվածային տեսիլքի մեջ նա ինձ բերեց Իսրայելի երկիրն ու դրեց մի չափազանց բարձր լեռան վրա, իսկ դրա վրա՝ դեմ հանդիման, կար քաղաքի պես մի շինվածք։ 3 Ինձ ներս տարավ։ Ահա մի մարդ կար այնտեղ, որի տեսքը փայլուն պղնձի նման էր։ Ձեռքին շինարարի լար ու չափաձող ուներ։ Ինքն էլ կանգնած էր դարպասի մոտ։ 4 Մարդն ասաց ինձ. «Տեսար, մարդո՛ւ որդի։ Արդ, աչքերովդ նայի՛ր, ականջներովդ լսի՛ր և մտքումդ հաստա՛տ պահիր այն ամենը, ինչ քեզ ցույց եմ տալու, որովհետև քեզ ցույց տալու համար եմ այստեղ եկել։ Եվ ինչ որ ինքդ տեսնես, ցույց ես տալու Իսրայելի տանը»։ 5 Ահա տաճարի շուրջը պարիսպներ կային։ Մարդու ձեռքին կար մի չափաձող՝ վեց կանգուն ու մեկ թիզ երկարությամբ։ Պարսպի լայնությունը նա չափեց մեկ ձողի հավասար, բարձրությունն էլ՝ մեկ ձողի հավասար։ 6 Մտավ այն դռնից, որ արևելք էր նայում և ուներ յոթ աստիճաններ։ Չափեց դռան վեցական կամարների խցերը. 7 մեկ խցի երկարությունը մեկ ձողի հավասար էր, լայնությունը՝ մեկ ձողի հավասար. խցերի միջի կամարները վեց կանգուն էին։ Երկրորդ խուցը լայնքով հավասար էր մեկ ձողի, երկայնքով էլ՝ մեկ ձողի հավասար. կամարը հինգ կանգուն էր։ 8 Երրորդ խուցն էլ լայնքով հավասար էր մեկ ձողի, երկայնքով էլ՝ մեկ ձողի հավասար. 9 դարպասի կամարը՝ գագաթի մոտ, ութ կանգուն էր։ Կամարները երկու կանգուն էին, և դրանք ներքին դռան կամարներն էին։ 10 Դռան խցերն իրար դիմաց էին, երեքն այս կողմից, երեքը՝ մյուս։ Երեքն էլ մի չափի էին, կամարներն էլ՝ մի չափի՝ այս և մյուս կողմերից։ 11 Դռան մուտքի լայնությունը չափեց տասը կանգուն, երկարությունը՝ տասներեք կանգուն։ 12 Դեմ դիմաց գտնվող խցերի թռիչքը մի կանգուն էր. մի կանգուն՝ այս կողմից, մի կանգուն՝ մյուս կողմից։ Երկու կողմերի խցերը վեցական կանգուն էին։ 13 Դուռը չափեց խցի մի պատից մյուսը. լայնքով քսանհինգ կանգուն էր. դուռը դռան վրա էր։ 14 Դռան կամարի թռիչքը, դռան շուրջը գտնվող խցերի հետ, վաթսուն կանգուն էր։ 15 Արտաքին գավթից մինչև ներքին դուռը կամարի թռիչքը հիսուն կանգուն էր։ 16 Գաղտնի լուսամուտներ կային ինչպես խցերի վրա, այնպես էլ գավթի ներքին դռան կամարներին՝ չորս կողմը։ Նաև լուսամուտներ մյուս կամարներին՝ ներսից ու դրսից։ Կամարների վերևում՝ այս ու այն կողմերից, արմավենիներ կային։ 17 Նա ինձ արտաքին գավիթը տարավ։ Ահա տեսա սենյակներ և սյուներ՝ գավթի չորս կողմը, որոնք շինված էին սենյակների շուրջը։ Շրջանակաձև սյուների միջև երեսուն սենյակներ կային։ 18 Սյուներն իրար դիմաց էին, դռների երկայնքով, նաև շրջանակաձև սյուներ կային ներսում։ 19 Նա չափեց գավթի լայնքը արտաքին դռնից մինչև ներքին դուռը, որ արևելք էր նայում. հարյուր կանգուն էր։ Նա ինձ հյուսիսային կողմը տարավ։ 20 Ահա մի դուռ տեսա, որ նայում էր արտաքին գավթի հյուսիսային կողմը։ Չափեց նրա երկարությունն ու լայնությունը, 21 նրա այս ու այն կողմը գտնվող խցերը, կամարը, կամարակապերն ու արմավենիները. այն արևելք նայող դռան չափն ուներ. հիսուն կանգուն երկարությունն էր, քսանհինգ կանգուն՝ լայնությունը։ 22 Նրա լուսամուտները, կամարներն ու արմավենիները արևելք նայող դռան համեմատ էին։ Յոթ աստիճաններ էին ելնում դեպի նա. ներսից կամարակապ էր։ 23 Ներքին գավթի դուռը նայում էր հյուսիսային դռանը, արևելք նայող դռան նման։ Նա գավիթը չափեց դռնից դուռ. հարյուր կանգուն էր։ 24 Նա ինձ հարավային կողմը տարավ։ Ահա մի դուռ տեսա, որ հարավ էր նայում։ Չափեց այն, նաև խցերը, կամարակապերը, կամարները, որոնք նույն չափն ունեին, ինչպես մյուսները։ 25 Նրա լուսամուտներն ու շրջանակաձև կամարներն էլ առաջինի լուսամուտների ու կամարների նման էին. երկարությունը հիսուն կանգուն էր, լայնությունը՝ քսանհինգ կանգուն։ 26 Դուռը յոթ աստիճաններ ուներ, ներսում՝ կամարներ և արմավենիներ այս ու այն կողմերից՝ կամարակապերի վրա։ 27 Ներքին դուռը գավթի դռան դիմաց էր և դեպի հարավ էր նայում։ Գավիթը նա դռնից դուռ չափեց. հարավային կողմից լայնությունը հարյուր կանգուն էր։ 28 Ինձ տարավ ներքին դռան գավիթը, որ հարավային կողմն էր նայում. չափեց հարավ նայող դուռը, որ նույն չափն ուներ. 29 նույն չափին էին նաև խցերը, կամարներն ու կամարակապերը։ Նրա շրջանակաձև լուսամուտների ու կամարների երկարությունը հիսուն կանգուն էր, լայնությունը՝ քսանհինգ։ 30 Նրա շուրջը կամարներ էին՝ հիսուն կանգուն երկարությամբ ու քսանհինգ կանգուն լայնությամբ։ 31 Կամարներ կային և արտաքին գավթում, կամարների վրա՝ արմավենիներ և սանդուղք՝ յոթ աստիճաններով։ 32 Ինձ տարավ դեպի այն դուռը, որ արևելյան կողմն էր նայում։ Այն ուներ նախորդի չափը։ Չափեց նաև 33 խցերը, կամարները, կամարակապերը, որոնք ունեին նախորդի չափը, լուսամուտները՝ նրա վրա և շուրջանակի կամարներ. երկարությունը հիսուն կանգուն էր, լայնությունը՝ քսանհինգ։ 34 Կամարներ կային ներսի գավթում, արմավենիներ՝ կամարների վրա, այս ու այն կողմերից, նաև յոթ աստիճաններ։ 35 Ինձ տարավ դեպի հյուսիսային դուռը։ Նույն չափով չափեց 36 խցերը, կամարներն ու կամարակապերը, չորս կողմի լուսամուտներն ու կամարները. երկարությունը հիսուն կանգուն էր, լայնությունը՝ քսանհինգ։ 37 Կամարներ կային արտաքին դռան վրա, արմավենիներ՝ կամարների վրա, այս ու այն կողմից, նաև ութ աստիճաններ։ 38 Նրա թե՛ սենյակները, թե՛ նրանց մուտքերն ու կամարները երկրորդ դռան դիմաց էին, որտեղ ողջակեզներն էին լվանում։ Դռան կամարի տակ սեղաններ կային, 39 երկուսն այս կողմում, երկուսը՝ մյուս, որպեսզի դրանց վրա մորթեին թե՛ մեղքերի և թե՛ հանցանքների համար զոհագործվող ողջակեզները։ 40 Ողջակեզները լվանալու ջրի խողովակի հարավային կողմը՝ այն դռան մուտքին, որ հյուսիս էր նայում, երկու սեղաններ կային, որ արևելք էին նայում։ Իսկ երկրորդ դռան հարավային կողմից՝ դռան կամարների դիմաց, նույնպես երկու սեղաններ կային։ Արևելյան կողմում՝ ութ սեղաններ, 41 չորսը՝ մի կողմում, չորսը՝ մյուս, հարավային դռան դիմաց։ Այնտեղ՝ ողջակիզման ութ սեղանների վրա էին մորթում զոհերն ու ողջակեզները։ 42 Կոփածո քարերից էին ողջակիզման չորս սեղանները՝ կանգուն ու կես երկարությամբ, կանգուն ու կես լայնությամբ և կանգուն ու կես բարձրությամբ, որպեսզի դրանց վրա դնեին գործիքը, որով մորթում էին զոհերն ու ողջակեզները։ 43 Ներսից չորսբոլորը թզաչափ քանդակված եզրեր կային, իսկ սեղանի վրա ծածկ՝ անձրևից ու տապից պատսպարելու համար։ 44 Ինձ տարավ ներքին գավիթը։ Ներքին գավիթն ուներ երկու պատշգամբ, մեկը՝ հարավային դռան կողմը, որ հյուսիս էր նայում և հարավ դուրս բերում, մյուսը՝ հյուսիսային դռան կողմը, որ հարավ էր նայում ու հյուսիս դուրս բերում։ 45 Նա ասաց ինձ. «Այս պատշգամբը, որ հարավային կողմն է նայում, այն քահանաների համար է, որոնք տաճարի պահպանությունն են կատարում, 46 իսկ հյուսիս նայող պատշգամբը՝ այն քահանաների համար, որոնք խորանի ծառայությունն են կատարում։ Դրանք Սադովկի որդիներն են, ղևտացիների ցեղից, որոնք կարող են մոտենալ՝ Տիրոջը պաշտամունք մատուցելու»։ 47 Նա չափեց գավիթը. երկարությունը հարյուր կանգուն էր, լայնությունն էլ՝ հարյուր կանգուն. այն քառակողմ էր։ Տաճարի դիմաց սեղանն էր։ 48 Ինձ տարավ դեպի տաճարի սյունազարդ սրահը։ Չափեց սյունազարդ սրահի լայնությունը. մի կողմից հինգ կանգուն էր, մյուս կողմից՝ հինգ կանգուն, մուտքի լայնությունը՝ տասնչորս կանգուն, դռան գլխի խոյակներն այս ու այն կողմերից՝ երեքական կանգուն։ 49 Սյունազարդ սրահի բարձրությունը քսան կանգուն էր, նրա լայնությունը՝ տասնմեկ կանգուն։ Տասը աստիճաններով էին բարձրանում այնտեղ. այս ու այն կողմերից երկու սյուներ ուներ։