2 Chronicles 31
1 Երբ այս ամենն ավարտվեց, ներկա գտնվող իսրայելացիները ոտքի ելան և ամբողջ Հուդայում, Բենիամինի, Եփրեմի ու Մանասեի երկրներում իսպառ փշրեցին պաշտամունքային սյուները և կործանեցին պաշտամունքի բարձունքներն ու բագինները։ Ապա բոլոր իսրայելացիներն իրենց քաղաքները վերադարձան՝ յուրաքանչյուրն իր կալվածքը։
2 Եզեկիան կարգեց քահանաների ու ղևտացիների դասերը, քահանաներից ու ղևտացիներից յուրաքանչյուրի դասը՝ ըստ իր սպասավորության, որպեսզի ողջակեզներ ու փրկության զոհեր մատուցեն, օրհնաբանեն, գոհաբանեն և ծառայեն Տիրոջ տան սրահների դռների մոտ։
3 Թագավորն իր ունեցվածքից բաժին հանեց առավոտյան և երեկոյան ողջակեզների, շաբաթ օրերի, ամսամուտների և Տիրոջ օրենքում նշված տոների ողջակեզների համար։
4 Նա Երուսաղեմում բնակվող ժողովրդին կարգադրեց, որ տան քահանաների ու ղևտացիների բաժինը, որպեսզի կարողանան կատարել Տիրոջ տան սպասավորությունը։
5 Երբ այս բանը հրամայեց, իսրայելացիները առատորեն բերեցին ցորենի, գինու, ձեթի, մեղրի և դաշտերի բոլոր բերքերի երախայրիքը։ Իսրայելացիներն ու Հուդայի բնակիչները առատորեն բերեցին նաև ամեն ինչի տասանորդը։
6 Հուդայի քաղաքներում բնակվող Իսրայելի և Հուդայի որդիներն էլ բերեցին զվարակների ու ոչխարների տասանորդները, բերեցին և կիտեցին կույտ-կույտ։
7 Կույտերն սկսեցին դիզվել երրորդ ամսին և ավարտի հասան յոթերորդ ամսին։
8 Եզեկիան ու իշխանները եկան տեսան կույտերը և օրհնեցին Տիրոջն ու նրա ժողովրդին՝ Իսրայելին։
9 Եզեկիան քահանաներին ու ղևտացիներին հարցրեց կույտերի մասին,
10 և Ազարիա քահանան՝ Սադովկի տան իշխանը, ասաց նրան. «Այն բանից հետո, երբ սկսեցին երախայրիքները բերել Տիրոջ տունը, մենք կերանք, խմեցինք և թողեցինք այդ մնացորդը։ Քանի որ Ամենակալ Տերն օրհնեց իր այդ ժողովրդին, ահա այսքան շատ մնացորդ է ավելացել»։
11 Եզեկիան ասաց. «Ուրիշ շտեմարաններ և՛ս պատրաստեք Տիրոջ տանը»։
12 Պատրաստեցին և հավատարմությամբ այնտեղ բերեցին երախայրիքներն ու տասանորդները։ Դրանց վերակացուն ղևտացի Քոնենիան էր, իսկ նրա եղբայր Սեմեին իր փոխանորդն էր։
13 Հեիելը, Ոզիասը, Նաթանը, Ասայելը, Հերիմովթը, Հովզաբադը, Ելիելը, Սամաքիան, Մաաթը, Բանեան ու նրա որդիներն օգնում էին Քոնենիային ու նրա եղբայր Սեմեիին, ինչպես հրամայել էր Եզեկիա արքան ու Տիրոջ տան ղեկավար Ազարիան։
14 Ղևտացի Հեմնայի որդի Կորեն՝ արևելյան կողմի դռան պահապանը, նշանակված էր ընծաների վրա՝ Տիրոջը նվիրաբերված երախայրիքներն ու ամենասուրբ նվերները բաժանելու համար։
15 Օդոմը, Բենիամինը, Հեսուն, Սեմեին, Ամարիան ու Սեքինիան հավատարմորեն օգնում էին նրան քահանաների քաղաքներում ՝ իրենց դասերի համաձայն բաժիններ հատկացնելու իրենց եղբայրներին՝ թե՛ մեծերին և թե՛ փոքրերին,
16 բացի երեք և ավելի բարձր տարիք ունեցող արական սեռի մարդկանցից, նաև բոլոր նրանց, ովքեր յուրաքանչյուր օրվա կարգի համաձայն մտնում էին Տիրոջ տունը՝ ըստ իրենց դասերի և պաշտոնի սպասավորություն կատարելու։
17 Քահանաները հաշվառված էին ըստ իրենց ազգատոհմերի, իսկ քսան տարեկան և ավելի բարձր տարիք ունեցող ղևտացիները՝ ըստ իրենց դասերի և պաշտոնի։
18 Մարդահամարի մեջ արձանագրված էին նաև նրանց տղաներն ու աղջիկները՝ ամբողջ բազմությամբ, քանի որ սրանք հավատարմորեն սրբագործեցին սրբարանը։
19 Քաղաքի շուրջը բնակվող Ահարոնի որդիների՝ քահանաների համար յուրաքանչյուր քաղաքում անվանապես մարդիկ նշանակվեցին, որպեսզի բաժին տան քահանաների բոլոր արուներին ու ղևտացիների ցուցակի մեջ արձանագրված բոլոր մարդկանց։
20 Եզեկիան այսպես արեց ամբողջ Հուդայում. նա արեց այն, ինչ բարի և ուղիղ էր Տիրոջ՝ իր Աստծու առաջ։
21 Ամեն գործի մեջ, որ ձեռնարկեց թե՛ Տիրոջ տանը ծառայելիս, թե՛ Տիրոջ օրենքն ու պատվիրանը կատարելիս, իր ամբողջ սրտով փնտրեց Աստծուն, կատարեց և հաջողություն ունեցավ։