Bible

1 Առաւօտ կանուխ, աւագ քահանաները երէցներուն, Օրէնքի ուսուցիչներուն եւ Ատեանի բոլոր անդամներուն հետ խորհրդակցեցան եւ Յիսուսը շղթայակապ տարին յանձնեցին Պիղատոսի: 2 Պիղատոս հարցուց Յիսուսի. – Դո՞ւն ես Հրեաներու թագաւորը։ Յիսուս պատասխանեց. – Ահա դո՛ւն կ՚ըսես։ 3 Աւագ քահանաները բազմաթիւ ամբաստանութիւններ կ՚ընէին, բայց Յիսուս պատասխան չէր տար։ 4 Պիղատոս կրկին անգամ հարցուց Յիսուսի. – Պատասխան չե՞ս տար, տե՛ս, որքա՛ն ամբաստանութիւններ կ՚ընեն քեզի դէմ։ 5 Յիսուս դարձեալ պատասխան չտուաւ, այնքան՝ որ Պիղատոս շատ զարմացաւ։ 6 Պիղատոս ամէն Զատիկի տօնինազատկ՚արձակէր բանտարկեալ մը, նայած թէ ժողովուրդը ո՛վ կ՚ուզէր։ 7 Բանտին մէջ կար Բարաբբա անունով մէկը, որ բանտարկուած էր խռովարարներու հետ, որոնք խռովութեան ժամանակ մէկը սպաննած էին։ 8 Ամբոխը սկսաւ աղաղակել եւ խնդրել որ Պիղատոս իր սովորութեան համաձայն մէկը ազատ արձակէ։ 9 Պիղատոս ըսաւ անոնց. – Կ՚ուզէ՞ք որ Հրեաներու թագաւորը ազատ արձակեմ։ 10 Որովհետեւ գիտէր թէ նախանձի պատճառով է որ աւագ քահանաները իրեն յանձնած էին Յիսուսը։ 11 Սակայն աւագ քահանաները ժողովուրդը գրգռեցին, որպէսզի Պիղատոսէն պահանջեն որ Բարաբբան ազատ արձակէ։ 12 Պիղատոս դարձեալ հարցուց անոնց. – Հապա ի՞նչ կ՚ուզէք որ ընեմ անոր՝ որ Հրեաներու թագաւոր կը կոչէք։ 13 Անոնք աւագ քահանաներէն դրդուելով՝ կրկին աղաղակեցին. – Խա՛չը հանէ զայն։ 14 Պիղատոս հարցուց. – Բայց ի՞նչ չարիք գործած է։ Սակայն անոնք աւելի բարձր աղաղակներով կ՚ըսէին. – Խա՛չը հանէ զայն։ 15 Պիղատոս ամբոխը գոհացնել ուզելով՝ ազատ արձակեց Բարաբբան, իսկ Յիսուսը մտրակով ծեծել տալէ ետք զինուորներուն յանձնեց, որպէսզի խաչեն։ 16 Զինուորները Յիսուսը տարին ներս, կառավարիչի պալատին բակը եւ կանչեցին գունդին մնացեալ զինուորները։ 17 Յիսուսի ծիրանի հագցուցին եւ գլխուն դրին փուշէ պսակ մը։ 18 Յետոյ սկսան բարեւել եւ ըսել. – Ողջո՛յն քեզի, Հրեաներո՛ւ թագաւոր։ 19 Եղէգով գլխուն կը զարնէին, երեսին կը թքնէին եւ ծունկիգալովկ՚երկրպագէինանոր։ 20 Այսպէս ծաղրելէ ետք, Յիսուսի վրայէն հանեցին ծիրանի հագուստը, իր հագուստները հագցուցին եւ դուրս հանեցին՝ որպէսզի խաչեն զայն։ 21 Սիմոն անունով Կիւրենացի մը, Աղեքսանդրի եւ Ռուֆոսի հայրը, արտէն վերադարձին այդտեղէն կ՚անցնէր։ Զինուորները զայն կեցուցին եւ ստիպեցին որ խաչափայտը շալկէ։ 22 Եւ Յիսուսը տարին Գողգոթա, որ կը նշանակէ գանկի վայր։ 23 Հոն զմուռսով խառնուած գինի տուին իրեն, բայց ինք չխմեց։ 24 Ապա խաչը հանեցին զայն եւ հագուստները բաժնելու համար վիճակ ձգեցին, տեսնելու համար թէ ո՞վ ի՛նչ բաժին պիտի առնէ։ 25 Առաւօտեան ժամը ինն էր, երբ զինք խաչեցին։ 26 Իր դատապարտութեան արձանագրութիւնը կ՚ըսէր. « Հրեաներու թագաւորն է»։ 27 Իրեն հետ խաչ հանեցին երկու աւազակներ ալ, մէկը իր աջ կողմը, իսկ միւսը՝ ձախ կողմը։ 28 Այս ձեւով իրականացաւ Սուրբ գիրքերուն մէջ գրուածը, որ կ՚ըսէ. «Չարագործներու կարգին դասուեցաւ»։ 29 Անոնք որոնք կ՚անցնէին խաչին առջեւէն, կը նախատէին զինք եւ իրենց գլուխը շարժելով կ՚ըսէին. – Դուն տաճարը պիտի քանդէիր եւ երեք օրէն շինէիր, հա՞. 30 դուն քեզ ազատէ եւ վա՛ր իջիր խաչէն։ 31 Նոյնպէս աւագ քահանաները Օրէնքի ուսուցիչներուն հետ կը հեգնէին զինք ու կ՚ըսէին. – Ուրիշները ազատեց, բայցինքզինք չի կրնարազատել։ 32 Այդ Քրիստոսը, Իսրայէլի թագաւորը, թող հիմա խաչէն վար իջնէ, որպէսզի տեսնենք եւ հաւատանք իրեն։ Իր հետ խաչուած երկու աւազակներն ալ կը նախատէին զինք։ 33 Գրեթէ կէսօր էր, երբ խաւարը պատեց ամբողջ երկիրը մինչեւ ժամը երեք։ 34 Ժամը երեքին Յիսուս բարձրաձայն աղաղակեց, ըսելով. – «Էլի՛, էլի՛, լա՞մա սաբաքթանի», որ կը նշանակէ. «Աստուած իմ, Աստուած իմ, ինչո՞ւ լքեցիր զիս»։ 35 Իր շուրջը գտնուողներէն ոմանք, որոնք լսեցին, ըսին. – Եղիան կը կանչէ։ 36 Անոնցմէ մէկը վազեց եւ սպունգը քացախին մէջ թաթխելով՝ եղէգին ծայրը անցուց եւ տուաւ Յիսուսի, որ խմէ, ու կ՚ըսէր. – Ձգեցէք տեսնենք, Եղիան պիտի գա՞յ զինք խաչէն վար իջեցնելու։ 37 Յիսուս բարձր աղաղակ մը արձակեց եւ հոգին աւանդեց։ 38 Տաճարին վարագոյրը վերէն վար պատռուեցաւ եւ երկու մասի բաժնուեցաւ։ 39 Հարիւրապետը որ հոն՝ անոր դիմաց կանգնած էր, երբ տեսաւ թէ ի՛նչպէս Յիսուս աղաղակեց եւ հոգին աւանդեց, ըսաւ. – Իրապէս որ այս մարդը Աստուծոյ Որդին էր։ 40 Հոն կիներ ալ կային, որոնք հեռուէն կը դիտէին։ Անոնց մէջ էին Մարիամ Մագդաղենացին, կրտսեր Յակոբոսի եւ Յովսէսի մայրը՝ Մարիամը, եւ Սողոմէն, 41 որոնք Յիսուսի Գալիլեա գտնուած միջոցին՝ անոր կը հետեւէին եւ կը սպասարկէին անոր։ Ուրիշ շատ կիներ ալ կային, որոնք իրենց հետ Երուսաղէմէն եկած էին։ 42 43 44 Պիղատոս զարմացաւ որ Յիսուս այդքան շուտ մեռաւ։ Իր մօտ կանչեց հարիւրապետը եւ հարցուց. – Իրապէ՞ս այդքան շուտ մեռաւ։ 45 Եւ հարիւրապետէն ստուգելէ ետք՝ արտօնեց որ Յովսէփ Յիսուսի մարմինը առնէ։ 46 Յովսէփ պատանքի կտաւ գնեց, խաչէն իջեցուց Յիսուսը եւ մարմինը փաթթելով դրաւ ժայռափոր գերեզմանի մը մէջ։ Ապա քար մը գլորեց, գերեզմանի մուտքին։ 47 Մարիամ Մագդաղենացին եւ Յակոբոսի ու Յովսէսի մայրը՝ Մարիամ, հոն էին եւ տեսան գերեզմանը, ուր մարմինը դրուեցաւ։