Job 21— WLC-MHNT

¹וַיַּעַן אִיּוֹב, וַיֹּאמַר׃

²שִׁמְעוּ שָׁמוֹעַ מִלָּתִי; וּתְהִי־זֹאת, תַּנְחוּמֹתֵיכֶם׃

³שָׂאוּנִי וְאָנֹכִי אֲדַבֵּר; וְאַחַר דַּבְּרִי תַלְעִיג׃

⁴הֶאָנֹכִי לְאָדָם שִׂיחִי; וְאִם־מַדּוּעַ, לֹא־תִקְצַר רוּחִי׃

⁵פְּנוּ־אֵלַי וְהָשַׁמּוּ; וְשִׂימוּ יָד עַל־פֶּה׃

⁶וְאִם־זָכַרְתִּי וְנִבְהָלְתִּי; וְאָחַז בְּשָׂרִי, פַּלָּצוּת׃

⁷מַדּוּעַ רְשָׁעִים יִחְיוּ; עָתְקוּ, גַּם־גָּבְרוּ חָיִל׃

⁸זַרְעָם נָכוֹן לִפְנֵיהֶם עִמָּם; וְצֶאֱצָאֵיהֶם, לְעֵינֵיהֶם׃

⁹בָּתֵּיהֶם שָׁלוֹם מִפָּחַד; וְלֹא שֵׁבֶט אֱלוֹהַּ עֲלֵיהֶם׃

¹⁰שׁוֹרוֹ עִבַּר וְלֹא יַגְעִל; תְּפַלֵּט פָּרָתוֹ, וְלֹא תְשַׁכֵּל׃

¹¹יְשַׁלְּחוּ כַצֹּאן עֲוִילֵיהֶם; וְיַלְדֵיהֶם, יְרַקֵּדוּן׃

¹²יִשְׂאוּ כְּתֹף וְכִנּוֹר; וְיִשְׂמְחוּ, לְקוֹל עוּגָב׃

¹³יְבַלּוּ (יְכַלּוּ) בַטּוֹב יְמֵיהֶם; וּבְרֶגַע, שְׁאוֹל יֵחָתּוּ׃

¹⁴וַיֹּאמְרוּ לָאֵל סוּר מִמֶּנּוּ; וְדַעַת דְּרָכֶיךָ, לֹא חָפָצְנוּ׃

¹⁵מַה־שַׁדַּי כִּי־נַעַבְדֶנּוּ; וּמַה־נּוֹעִיל, כִּי נִפְגַּע־בּוֹ׃

¹⁶הֵן לֹא בְיָדָם טוּבָם; עֲצַת רְשָׁעִים, רָחֲקָה מֶנִּי׃

¹⁷כַּמָּה נֵר־רְשָׁעִים יִדְעָךְ, וְיָבֹא עָלֵימוֹ אֵידָם; חֲבָלִים, יְחַלֵּק בְּאַפּוֹ׃

¹⁸יִהְיוּ, כְּתֶבֶן לִפְנֵי־רוּחַ; וּכְמֹץ, גְּנָבַתּוּ סוּפָה׃

¹⁹אֱלוֹהַּ, יִצְפֹּן־לְבָנָיו אוֹנוֹ; יְשַׁלֵּם אֵלָיו וְיֵדָע׃

²⁰יִרְאוּ עֵינוֹ (עֵינָיו) כִּידוֹ; וּמֵחֲמַת שַׁדַּי יִשְׁתֶּה׃

²¹כִּי מַה־חֶפְצוֹ בְּבֵיתוֹ אַחֲרָיו; וּמִסְפַּר חֳדָשָׁיו חֻצָּצוּ׃

²²הַלְאֵל יְלַמֶּד־דָּעַת; וְהוּא, רָמִים יִשְׁפּוֹט׃

²³זֶה, יָמוּת בְּעֶצֶם תֻּמּוֹ; כֻּלּוֹ, שַׁלְאֲנַן וְשָׁלֵיו׃

²⁴עֲטִינָיו מָלְאוּ חָלָב; וּמֹחַ עַצְמוֹתָיו יְשֻׁקֶּה׃

²⁵וְזֶה, יָמוּת בְּנֶפֶשׁ מָרָה; וְלֹא־אָכַל, בַּטּוֹבָה׃

²⁶יַחַד עַל־עָפָר יִשְׁכָּבוּ; וְרִמָּה, תְּכַסֶּה עֲלֵיהֶם׃

²⁷הֵן יָדַעְתִּי מַחְשְׁבוֹתֵיכֶם; וּמְזִמּוֹת, עָלַי תַּחְמֹסוּ׃

²⁸כִּי תֹאמְרוּ, אַיֵּה בֵית־נָדִיב; וְאַיֵּה, אֹהֶל מִשְׁכְּנוֹת רְשָׁעִים׃

²⁹הֲלֹא שְׁאֶלְתֶּם עוֹבְרֵי דָרֶךְ; וְאֹתֹתָם, לֹא תְנַכֵּרוּ׃

³⁰כִּי לְיוֹם אֵיד יֵחָשֶׂךְ רָע; לְיוֹם עֲבָרוֹת יוּבָלוּ׃

³¹מִי־יַגִּיד עַל־פָּנָיו דַּרְכּוֹ; וְהוּא־עָשָׂה, מִי יְשַׁלֶּם־לוֹ׃

³²וְהוּא לִקְבָרוֹת יוּבָל; וְעַל־גָּדִישׁ יִשְׁקוֹד׃

³³מָתְקוּ־לוֹ, רִגְבֵי נָחַל וְאַחֲרָיו כָּל־אָדָם יִמְשׁוֹךְ; וּלְפָנָיו, אֵין מִסְפָּר׃

³⁴וְאֵיךְ תְּנַחֲמוּנִי הָבֶל; וּתְשׁוּבֹתֵיכֶם, נִשְׁאַר־מָעַל׃ ס