Ezekiel 16— MHB

1ויהי דב׹ יהוה אלי לאמ׹:

2בן אדם הודע את יךושלם את תועבתיה:

3ואמךת כה אמך אדני יהוה ליךושלם מכךתיך ומלדתיך מאךץ הכנעני אביך האמ׹י ואמך חתית:

4ומולדותיך ביום הולדת אתך לא כךת שךך ובמים לא ךח׊ת למשעי והמלח לא המלחת והחתל לא חתלת:

5לא חסה עליך עין לעשות לך אחת מאלה לחמלה עליך ותשלכי אל ×€× ×™ השדה בגעל נ׀שך ביום הלדת אתך:

6ואעבך עליך וא׹אך מתבוססת בדמיך ואמ׹ לך בדמיך חיי ואמ׹ לך בדמיך חיי:

7׹בבה כשמח השדה נתתיך ותךבי ותגדלי ותבאי בעדי עדיים שדים נכנו ושעךך שמח ואת עךם ועךיה:

8ואעבך עליך וא׹אך והנה עתך עת דדים וא׀ךש ×›× ×€×™ עליך ואכסה עךותך ואשבע לך ואבוא בבךית אתך נאם אדני יהוה ותהיי לי:

9וא׹חשך במים ואשטף דמיך מעליך ואסכך בשמן:

10ואלבישך ׹קמה ואנעלך תחש ואחבשך בשש ואכסך משי:

11ואעדך עדי ואתנה שמידים על ידיך ו׹ביד על ג׹ונך:

12ואתן נזם על א׀ך ועגילים על אזניך ועטךת ת׀אךת בךאשך:

13ותעדי זהב וכסף ומלבושך ששי ומשי ו׹קמה סלת ודבש ושמן אכלתי ותי׀י במאד מאד ות׊לחי למלוכה:

14וישא לך שם בגוים בי׀יך כי כליל הוא בהד׹י אשך שמתי עליך נאם אדני יהוה:

15ותבטחי בי׀יך ותזני על שמך ותש׀כי את תזנותיך על כל עובך לו יהי:

16ותקחי מבגדיך ותעשי לך במות טלאות ותזני עליהם לא באות ולא יהיה:

17ותקחי כלי ת׀אךתך מזהבי ומכס׀י אשך נתתי לך ותעשי לך שלמי זכ׹ ותזני בם:

18ותקחי את בגדי ךקמתך ותכסים ושמני וקטךתי נתתי ל׀ניהם:

19ולחמי אשך נתתי לך סלת ושמן ודבש האכלתיך ונתתיהו ל׀ניהם ל׹יח ניחח ויהי נאם אדני יהוה:

20ותקחי את בניך ואת בנותיך אשך ילדת לי ותזבחים להם לאכול המעט מתזנתך:

21ותשחטי את בני ותתנים בהעביך אותם להם:

22ואת כל תועבתיך ותזנתיך לא זכךתי את ימי נעוךיך בהיותך עךם ועךיה מתבוססת בדמך היית:

23ויהי אח׹י כל ךעתך אוי אוי לך נאם אדני יהוה:

24ותבני לך גב ותעשי לך ׹מה בכל ׹חוב:

25אל כל ךאש ד׹ך בנית ךמתך ותתעבי את י׀יך ות׀שקי את ׹גליך לכל עובך ותךבי את תזנתך:

26ותזני אל בני מש׹ים שכניך גדלי בשך ותךבי את תזנתך להכעיסני:

27והנה נטיתי ידי עליך ואגךע חקך ואתנך בנ׀ש שנאותיך בנות ׀לשתים הנכלמות מד׹כך זמה:

28ותזני אל בני אשוך מבלתי שבעתך ותזנים וגם לא שבעת:

29ותךבי את תזנותך אל אךץ כנען כשדימה וגם בזאת לא שבעת:

30מה אמלה לבתך נאם אדני יהוה בעשותך את כל אלה מעשה אשה זונה שלטת:

31בבנותיך גבך בךאש כל ד׹ך וךמתך עשיתי בכל ׹חוב ולא הייתי כזונה לקלס אתנן:

32האשה המנא׀ת תחת אישה תקח את ז׹ים:

33לכל זנות יתנו נדה ואת נתת את נדניך לכל מאהביך ותשחדי אותם לבוא אליך מסביב בתזנותיך:

34ויהי בך ה׀ך מן הנשים בתזנותיך ואח׹יך לא זונה ובתתך אתנן ואתנן לא נתן לך ותהי לה׀ך:

35לכן זונה שמעי דב׹ יהוה:

36כה אמך אדני יהוה יען הש׀ך נחשתך ותגלה עךותך בתזנותיך על מאהביך ועל כל גלולי תועבותיך וכדמי בניך אשך נתת להם:

37לכן הנני מקבץ את כל מאהביך אשך עךבת עליהם ואת כל אשך אהבת על כל אשך שנאת וקב׊תי אתם עליך מסביב וגליתי עךותך אלהם ו׹או את כל עךותך:

38וש׀טתיך מש׀טי נא׀ות וש׀כת דם ונתתיך דם חמה וקנאה:

39ונתתי אותך בידם והךסו גבך ונת׊ו ךמתיך וה׀שיטו אותך בגדיך ולקחו כלי ת׀אךתך והניחוך עיךם ועךיה:

40והעלו עליך קהל ו׹גמו אותך באבן ובתקוך בחךבותם:

41ושך׀ו בתיך באש ועשו בך ש׀טים לעיני נשים ךבות והשבתיך מזונה וגם אתנן לא תתני עוד:

42והנחתי חמתי בך וסךה קנאתי ממך ושקטתי ולא אכעס עוד:

43יען אשך לא זכךתי את ימי נעוךיך ותךגזי לי בכל אלה וגם אני הא ד׹כך בךאש נתתי נאם אדני יהוה ולא עשיתי את הזמה על כל תועבתיך:

44הנה כל המשל עליך ימשל לאמ׹ כאמה בתה:

45בת אמך את געלת אישה ובניה ואחות אחותך את אשך געלו אנשיהן ובניהן אמכן חתית ואביכן אמ׹י:

46ואחותך הגדולה שמךון היא ובנותיה היושבת על שמאולך ואחותך הקטנה ממך היושבת מימינך סדם ובנותיה:

47ולא בד׹כיהן הלכת ובתועבותיהן עשיתי כמעט קט ותשחתי מהן בכל ד׹כיך:

48חי אני נאם אדני יהוה אם עשתה סדם אחותך היא ובנותיה כאשך עשית את ובנותיך:

49הנה זה היה עון סדם אחותך גאון שבעת לחם ושלות השקט היה לה ולבנותיה ויד עני ואביון לא החזיקה:

50ותגבהינה ותעשינה תועבה ל׀ני ואסיך אתהן כאשך ךאיתי:

51ושמךון כחשי חטאתיך לא חטאה ותךבי את תועבותיך מהנה ות׊דקי את אחותך בכל תועבתיך אשך עשיתי:

52גם את שאי כלמתך אשך ׀ללת לאחותך בחטאתיך אשך התעבת מהן ת׊דקנה ממך וגם את בושי ושאי כלמתך ב׊דקתך אחיותך:

53ושבתי את שבותהן את שבית סדם ובנותיה ואת שבית שמךון ובנותיה ושבית שביתיך בתוכהנה:

54למען תשאי כלמתך ונכלמת מכל אשך עשית בנחמך אתן:

55ואחותיך סדם ובנותיה תשבן לקדמתן ושמךון ובנותיה תשבן לקדמתן ואת ובנותיך תשבינה לקדמתכן:

56ולוא היתה סדם אחותך לשמועה ב׀יך ביום גאוניך:

57בט׹ם תגלה ךעתך כמו עת חך׀ת בנות אךם וכל סביבותיה בנות ׀לשתים השאטות אותך מסביב:

58את זמתך ואת תועבותיך את נשאתים נאם יהוה:

59כי כה אמך אדני יהוה ועשית אותך כאשך עשית אשך בזית אלה לה׀ך בךית:

60וזכךתי אני את בךיתי אותך בימי נעוךיך והקמותי לך בךית עולם:

61וזכךת את ד׹כיך ונכלמת בקחתך את אחותיך הגדלות ממך אל הקטנות ממך ונתתי אתהן לך לבנות ולא מבךיתך:

62והקימותי אני את בךיתי אתך וידעת כי אני יהוה:

63למען תזכךי ובשת ולא יהיה לך עוד ׀תחון ×€×” מ׀ני כלמתך בכ׀ךי לך לכל אשך עשית נאם אדני יהוה:

Choose Translation

Switch translation for Ezekiel 16.

Reading Settings

Paragraph viewDisplay verses as flowing paragraphs instead of individual lines
Show verse numbersDisplay verse numbers inline
Red letterHighlight the words of Christ in red

Sign in to save your reading preferences across sessions.