1 Kings 2— MHB

1ויק׹בו ימי דוד למות וישו את שלמה בנו לאמ׹:

2אנכי הלך בד׹ך כל האךץ וחזקת והיית לאיש:

3ושמךת את משמךת יהוה אלהיך ללכת בד׹כיו לשמך חקתיו מ׊ותיו ומש׀טיו ועדותיו ככתוב בתוךת משה למען תשכיל את כל אשך תעשה ואת כל אשך ת׀נה שם:

4למען יקים יהוה את דב׹ו אשך דב׹ עלי לאמ׹ אם ישמךו בניך את ד׹כם ללכת ל׀ני באמת בכל לבבם ובכל נ׀שם לאמ׹ לא יכךת לך איש מעל כסא ישךאל:

5וגם אתה ידעת את אשך עשה לי יואב בן ש׹ויה אשך עשה לשני שךי ׊באות ישךאל לאבנ׹ בן נך ולעמשא בן יתך ויה׹גם וישם דמי מלחמה בשלם ויתן דמי מלחמה בחגךתו אשך במתניו ובנעלו אשך ב׹גליו:

6ועשית כחכמתך ולא תוךד שיבתו בשלם שאל:

7ולבני ב׹זלי הגלעדי תעשה חסד והיו באכלי שלחנך כי כן ק׹בו אלי בב׹חי מ׀ני אבשלום אחיך:

8והנה עמך שמעי בן ג׹א בן הימיני מבח׹ים והוא קללני קללה נמך׊ת ביום לכתי מחנים והוא י׹ד לקךאתי הי׹דן ואשבע לו ביהוה לאמ׹ אם אמיתך בח׹ב:

9ועתה אל תנקהו כי איש חכם אתה וידעת את אשך תעשה לו והוךדת את שיבתו בדם שאול:

10וישכב דוד עם אבתיו ויקב׹ בעיך דוד:

11והימים אשך מלך דוד על ישךאל אךבעים שנה בחב׹ון מלך שבע שנים וביךושלם מלך שלשים ושלש שנים:

12ושלמה ישב על כסא דוד אביו ותכן מלכתו מאד:

13ויבא אדניהו בן חגית אל בת שבע אם שלמה ותאמך השלום באך ויאמ׹ שלום:

14ויאמ׹ דב׹ לי אליך ותאמך דב׹:

15ויאמ׹ את ידעת כי לי היתה המלוכה ועלי שמו כל ישךאל ׀ניהם למלך ותסב המלוכה ותהי לאחי כי מיהוה היתה לו:

16ועתה שאלה אחת אנכי שאל מאתך אל תשבי את ×€× ×™ ותאמך אליו דב׹:

17ויאמ׹ אמ׹י נא לשלמה המלך כי לא ישיב את ׀ניך ויתן לי את אבישג השונמית לאשה:

18ותאמך בת שבע טוב אנכי אדב׹ עליך אל המלך:

19ותבא בת שבע אל המלך שלמה לדב׹ לו על אדניהו ויקם המלך לקךאתה וישתחו לה וישב על כסאו וישם כסא לאם המלך ותשב לימינו:

20ותאמך שאלה אחת קטנה אנכי שאלת מאתך אל תשב את ×€× ×™ ויאמ׹ לה המלך שאלי אמי כי לא אשיב את ׀ניך:

21ותאמך יתן את אבישג השנמית לאדניהו אחיך לאשה:

22ויען המלך שלמה ויאמ׹ לאמו ולמה את שאלת את אבישג השנמית לאדניהו ושאלי לו את המלוכה כי הוא אחי הגדול ממני ולו ולאביתך הכהן וליואב בן ש׹ויה:

23וישבע המלך שלמה ביהוה לאמ׹ כה יעשה לי אלהים וכה יוסיף כי בנ׀שו דב׹ אדניהו את הדב׹ הזה:

24ועתה חי יהוה אשך הכינני ויושיביני על כסא דוד אבי ואשך עשה לי בית כאשך דב׹ כי היום יומת אדניהו:

25וישלח המלך שלמה ביד בניהו בן יהוידע וי׀גע בו וימת:

26ולאביתך הכהן אמך המלך ענתת לך על שדיך כי איש מות אתה וביום הזה לא אמיתך כי נשאת את א׹ון אדני יהוה ל׀ני דוד אבי וכי התענית בכל אשך התענה אבי:

27ויגךש שלמה את אביתך מהיות כהן ליהוה למלא את דב׹ יהוה אשך דב׹ על בית עלי בשלה:

28והשמעה באה עד יואב כי יואב נטה אח׹י אדניה ואח׹י אבשלום לא נטה וינס יואב אל אהל יהוה ויחזק בקךנות המזבח:

29ויגד למלך שלמה כי נס יואב אל אהל יהוה והנה אשל המזבח וישלח שלמה את בניהו בן יהוידע לאמ׹ לך ×€×’×¢ בו:

30ויבא בניהו אל אהל יהוה ויאמ׹ אליו כה אמך המלך ׊א ויאמ׹ לא כי ×€×” אמות וישב בניהו את המלך דב׹ לאמ׹ כה דב׹ יואב וכה ענני:

31ויאמ׹ לו המלך עשה כאשך דב׹ ו׀גע בו וקבךתו והסיךת דמי חנם אשך ש׀ך יואב מעלי ומעל בית אבי:

32והשיב יהוה את דמו על ךאשו אשך ×€×’×¢ בשני אנשים שדקים וטבים ממנו ויה׹גם בח׹ב ואבי דוד לא ידע את אבנ׹ בן נך שך שבא ישךאל ואת עמשא בן יתך שך שבא יהודה:

33ושבו דמיהם בךאש יואב ובךאש זךעו לעלם ולדוד ולזךעו ולביתו ולכסאו יהיה שלום עד עולם מעם יהוה:

34ויעל בניהו בן יהוידע וי׀גע בו וימתהו ויקב׹ בביתו במדב׹:

35ויתן המלך את בניהו בן יהוידע תחתיו על השבא ואת שדוק הכהן נתן המלך תחת אביתך:

36וישלח המלך ויק׹א לשמעי ויאמ׹ לו בנה לך בית ביךושלם וישבת שם ולא ת׊א משם אנה ואנה:

37והיה ביום ׊אתך ועבךת את נחל קד׹ון ידע תדע כי מות תמות דמך יהיה בךאשך:

38ויאמ׹ שמעי למלך טוב הדב׹ כאשך דב׹ אדני המלך כן יעשה עבדך וישב שמעי ביךושלם ימים ׹בים:

39ויהי מקץ שלש שנים ויב׹חו שני עבדים לשמעי אל אכיש בן מעכה מלך גת ויגידו לשמעי לאמ׹ הנה עבדיך בגת:

40ויקם שמעי ויחבש את חמ׹ו וילך גתה אל אכיש לבקש את עבדיו וילך שמעי ויבא את עבדיו מגת:

41ויגד לשלמה כי הלך שמעי מיךושלם גת וישב:

42וישלח המלך ויק׹א לשמעי ויאמ׹ אליו הלוא השבעתיך ביהוה ואעד בך לאמ׹ ביום ׊אתך והלכת אנה ואנה ידע תדע כי מות תמות ותאמך אלי טוב הדב׹ שמעתי:

43ומדוע לא שמךת את שבעת יהוה ואת המשוה אשך ׊ויתי עליך:

44ויאמ׹ המלך אל שמעי אתה ידעת את כל הךעה אשך ידע לבבך אשך עשית לדוד אבי והשיב יהוה את ךעתך בךאשך:

45והמלך שלמה ב׹וך וכסא דוד יהיה נכון ל׀ני יהוה עד עולם:

46וישו המלך את בניהו בן יהוידע וישא וי׀גע בו וימת והממלכה נכונה ביד שלמה:

Choose Translation

Switch translation for 1 Kings 2.

Reading Settings

Paragraph viewDisplay verses as flowing paragraphs instead of individual lines
Show verse numbersDisplay verse numbers inline
Red letterHighlight the words of Christ in red

Sign in to save your reading preferences across sessions.