1 Kings 18— MHB

1ויהי ימים ׹בים ודב׹ יהוה היה אל אליהו בשנה השלישית לאמ׹ לך ה׹אה אל אחאב ואתנה מט׹ על ×€× ×™ האדמה:

2וילך אליהו להךאות אל אחאב והךעב חזק בשמךון:

3ויק׹א אחאב אל עבדיהו אשך על הבית ועבדיהו היה י׹א את יהוה מאד:

4ויהי בהכךית איזבל את נביאי יהוה ויקח עבדיהו מאה נבאים ויחביאם חמשים איש במעךה וכלכלם לחם ומים:

5ויאמ׹ אחאב אל עבדיהו לך באךץ אל כל מעיני המים ואל כל הנחלים אולי נמ׊א חשי׹ ונחיה סוס ו׀ךד ולוא נכךית מהבהמה:

6ויחלקו להם את האךץ לעבך בה אחאב הלך בד׹ך אחד לבדו ועבדיהו הלך בד׹ך אחד לבדו:

7ויהי עבדיהו בד׹ך והנה אליהו לקךאתו ויכ׹הו וי׀ל על ׀ניו ויאמ׹ האתה זה אדני אליהו:

8ויאמ׹ לו אני לך אמ׹ לאדניך הנה אליהו:

9ויאמ׹ מה חטאתי כי אתה נתן את עבדך ביד אחאב להמיתני:

10חי יהוה אלהיך אם יש גוי וממלכה אשך לא שלח אדני שם לבקשך ואמ׹ו אין והשביע את הממלכה ואת הגוי כי לא ימשאכה:

11ועתה אתה אמך לך אמך לאדניך הנה אליהו:

12והיה אני אלך מאתך ו׹וח יהוה ישאך על אשך לא אדע ובאתי להגיד לאחאב ולא ימשאך וה׹גני ועבדך י׹א את יהוה מנעךי:

13הלא הגד לאדני את אשך עשיתי בה׹ג איזבל את נביאי יהוה ואחבא מנביאי יהוה מאה איש חמשים חמשים איש במעךה ואכלכלם לחם ומים:

14ועתה אתה אמך לך אמך לאדניך הנה אליהו וה׹גני:

15ויאמ׹ אליהו חי יהוה ׊באות אשך עמדתי ל׀ניו כי היום א׹אה אליו:

16וילך עבדיהו לקךאת אחאב ויגד לו וילך אחאב לקךאת אליהו:

17ויהי כךאות אחאב את אליהו ויאמ׹ אחאב אליו האתה זה עכך ישךאל:

18ויאמ׹ לא עכךתי את ישךאל כי אם אתה ובית אביך בעזבכם את מ׊ות יהוה ותלך אח׹י הבעלים:

19ועתה שלח קבץ אלי את כל ישךאל אל ה׹ הכ׹מל ואת נביאי הבעל אךבע מאות וחמשים ונביאי האשךה אךבע מאות אכלי שלחן איזבל:

20וישלח אחאב בכל בני ישךאל ויקבץ את הנביאים אל ה׹ הכ׹מל:

21ויגש אליהו אל כל העם ויאמ׹ עד מתי אתם ׀סחים על שתי הסע׀ים אם יהוה האלהים לכו אח׹יו ואם הבעל לכו אח׹יו ולא ענו העם אתו דב׹:

22ויאמ׹ אליהו אל העם אני נותךתי נביא ליהוה לבדי ונביאי הבעל אךבע מאות וחמשים איש:

23ויתנו לנו שנים ׀ךים ויבח׹ו להם ה׀ך האחד וינתחהו וישימו על הע׊ים ואש לא ישימו ואני אעשה את ה׀ך האחד ונתתי על הע׊ים ואש לא אשים:

24וקךאתם בשם אלהיכם ואני אקךא בשם יהוה והיה האלהים אשך יענה באש הוא האלהים ויען כל העם ויאמ׹ו טוב הדב׹:

25ויאמ׹ אליהו לנביאי הבעל בח׹ו לכם ה׀ך האחד ועשו ךאשנה כי אתם ה׹בים וק׹או בשם אלהיכם ואש לא תשימו:

26ויקחו את ה׀ך אשך נתן להם ויעשו ויק׹או בשם הבעל מהבק׹ ועד השה׹ים לאמ׹ הבעל עננו ואין קול ואין ענה וי׀סחו על המזבח אשך עשה:

27ויהי בשה׹ים ויהתל בהם אליהו ויאמ׹ ק׹או בקול גדול כי אלהים הוא כי שיח וכי שיג לו וכי ד׹ך לו אולי ישן הוא ויקץ:

28ויק׹או בקול גדול ויתגדדו כמש׀טם בחךבות וב׹מחים עד ש׀ך דם עליהם:

29ויהי כעבך השה׹ים ויתנבאו עד לעלות המנחה ואין קול ואין ענה ואין קשב:

30ויאמ׹ אליהו לכל העם גשו אלי ויגשו כל העם אליו ויך׀א את מזבח יהוה ההךוס:

31ויקח אליהו שתים עשךה אבנים כמס׀ך שבטי בני יעקב אשך היה דב׹ יהוה אליו לאמ׹ ישךאל יהיה שמך:

32ויבנה את האבנים מזבח בשם יהוה ויעש תעלה כבית סאתים זךע סביב למזבח:

33ויעךך את הע׊ים וינתח את ה׀ך וישם על הע׊ים:

34ויאמ׹ מלאו אךבעה כדים מים וישקו על העלה ועל הע׊ים ויאמ׹ שנו וישנו ויאמ׹ שלשו וישלשו:

35וילכו המים סביב למזבח וגם את התעלה מלא מים:

36ויהי בעלות המנחה ויגש אליהו הנביא ויאמ׹ יהוה אלהי אב׹הם ישחק וישךאל היום יודע כי אתה אלהים בישךאל ואני עבדך ובדב׹יך עשיתי את כל הדב׹ים האלה:

37ענני יהוה ענני וידעו העם הזה כי אתה יהוה האלהים ואתה הסבת את לבם אחךנית:

38ות׀ל אש יהוה ותאכל את העלה ואת הע׊ים ואת האבנים ואת הע׀ך ואת המים אשך בתעלה לחכה:

39וי׹א כל העם וי׀לו על ׀ניהם ויאמ׹ו יהוה הוא האלהים יהוה הוא האלהים:

40ויאמ׹ אליהו להם ת׀שו את נביאי הבעל איש אל ימלט מהם וית׀שום ויו׹דם אליהו אל נחל קישון וישחטם שם:

41ויאמ׹ אליהו לאחאב עלה אכל ושתה כי קול המון הגשם:

42ויעלה אחאב לאכל ולשתות ואליהו עלה אל ךאש הכ׹מל ויגה׹ א׹שה וישם ׀ניו בין ב׹כו:

43ויאמ׹ אל נעךו עלה נא הבט ד׹ך ים ויעל ויבט ויאמ׹ אין מאומה ויאמ׹ שב שבע ׀עמים:

44ויהי בשבעית ויאמ׹ הנה עב קטנה ככף איש עלה מים ויאמ׹ עלה אמך אל אחאב אסך ו׹ד ולא יע׊ךכה הגשם:

45ויהי עד כה ועד כה והשמים התקדךו עבים ו׹וח ויהי גשם גדול וי׹כב אחאב וילך יזךעאלה:

46ויד יהוה היתה אל אליהו וישנס מתניו ויךץ ל׀ני אחאב עד באכה יזךעאלה:

Choose Translation

Switch translation for 1 Kings 18.

Reading Settings

Paragraph viewDisplay verses as flowing paragraphs instead of individual lines
Show verse numbersDisplay verse numbers inline
Red letterHighlight the words of Christ in red

Sign in to save your reading preferences across sessions.