John 16— DHNT

¹את־אלה דברתי אליכם למען לא תכשלו׃

²הנה ינדו אתכם ואף באה השעה אשר כל־הרג אתכם ידמה להקריב עבודה לאלהים׃

³וכזאת יעשו לכם יען גם־את־אבי וגם־אתי לא ידעו׃

⁴אבל הגדתי לכם את־אלה למען אשר־בבא השעה תזכרום כי אנכי אמרתי אליכם וכאלה לא־אמרתי אליכם מראש כי הייתי עמכם׃

⁵ועתה הלך אנכי אל־שלחי ולא ישאלני איש מכם אנה תלך׃

⁶אך על־דברי את־אלה אליכם מלא לבבכם עצבת׃

⁷אולם האמת אגיד לכם כי לכתי אך־טוב לכם כי אם־לא אלך לא־יבא אליכם הפרקליט ואם־אלך אשלחהו אליכם׃

⁸והיה בבאו יוכיח את־העולם על־דבר החטא והצדק והמשפט׃

⁹על־החטא כי לא־האמינו בי׃

¹⁰ועל־הצדק כי אלך אל־אבי ולא תוסיפו לראות אתי׃

¹¹ועל־המשפט כי נדון שר העולם הזה׃

¹²עוד רבות לי להגיד לכם אך לא־תוכלון שאת עתה׃

¹³ורוח האמת בבאו הוא ידריך אתכם אל־כל־האמת כי לא ידבר מעצמו כי אם־אשר ישמע ידבר והבאות יגיד לכם׃

¹⁴הוא יפארני כי משלי יקח ויגיד לכם׃

¹⁵כל אשר לאבי לי הוא על־כן אמרתי כי משלי יקח ויגיד לכם׃

¹⁶הן־מעט ולא תראוני ועוד־מעט ותחזוני כי־אני הלך אל־אבי׃

¹⁷ומקצת תלמידיו נדברו איש אל־אחיו לאמר מה־זה אמר אלינו הן־מעט ולא תראוני ועוד־מעט ותחזוני ואמרו אני הלך אל־אבי׃

¹⁸ויאמרו מה־זה אשר אמר מעט לא ידענו מה־דבר׃

¹⁹וידע ישוע כי עם־לבבם לשאל אתו ויאמר אליהם העל־זאת אתם דרשים ביניכם כי אמרתי הן־מעט ולא תראוני ועוד־מעט ותחזוני׃

²⁰אמן אמן אני אמר לכם כי אתם תבכו ותילילו והעולם ישמח הן־אתם תעצבו אכן עצבכם יהפך לששון׃

²¹האשה בלדתה עצב לה כי באה עתה ואחרי ילדה את־הילד לא־תזכר עוד את־עצבונה משמחתה כי־אדם נולד לעולם׃

²²וגם־אתם כעת תתעצבו אך אשוב אראה אתכם ושש לבכם ואין־לקח שמחתכם מכם׃

²³וביום ההוא לא תשאלוני דבר אמן אמן אני אמר לכם כי כל־אשר תשאלו מאת אבי בשמי יתננו לכם׃

²⁴עד־עתה לא־שאלתם דבר בשמי שאלו ותקחו למען תמלא שמחתכם׃

²⁵את־אלה דברתי אליכם במשלים אכן שעה באה ולא אדבר עוד אליכם במשלים כי אם־ברור אמלל לכם על־אבי׃

²⁶ביום ההוא תשאלו בשמי ואינני אמר לכם כי אני אעתיר לאבי בעדכם׃

²⁷כי־אבי גם־הוא אהב אתכם עקב אשר אהבתוני והאמנתם כי־מאת אלהים יצאתי׃

²⁸מאת האב יצאתי ואבא לעולם אשובה אעזב את־העולם ואלך אל־אבי׃

²⁹ויאמרו אליו תלמידיו הנה כעת ברור תמלל ולא תמשל משל׃

³⁰עתה ידענו כי־כל ידעת ולא תצטרך כי ישאלך איש בזאת נאמין כי מאת אלהים יצאת׃

³¹ויען אתם ישוע עתה תאמינו׃

³²הנה שעה באה ועתה זה הגיעה ונפצותם איש איש לביתו ואתי תעזבו לבדי ואינני לבדי כי אבי עמדי׃

³³את־אלה דברתי אליכם למען בי יהיה־לכם שלום בעולם צרה תבוא עליכם אך־יאמץ לבבכם אני נצחתי את־העולם׃