Acts 8— DHNT

¹ושאול גם־הוא היה רצה בהרגתו ותהי ביום ההוא רדיפה גדולה על־הקהלה אשר בירושלים ויפצו כלם בערי יהודה ושמרון לבד מן־השליחים׃

²וישאו אנשים חסידים את־אסטפנוס ויקברהו ויספדו עליו מספד גדול׃

³ושאול החריב את־הקהלה וישוטט בבתים ויסחב משם אנשים ונשים ויסגירם לכלא׃

⁴והנפוצים עברו בארץ ויבשרו את־הדבר׃

⁵ופילפוס ירד אל־עיר שמרון ויכרז להם את־המשיח׃

⁶ויקשב המון העם בלב אחד אל־אמרי פילפוס בשמעם ובראותם את־האתות אשר עשה׃

⁷כי רבים היו אחוזי רוחות הטמאה והרוחות יצאו מהם צעקות בקול גדול ורבים נכי אברים ופסחים וירפאו׃

⁸ותהי שמחה גדולה בעיר ההיא׃

⁹ואיש אחד ושמו שמעון היה מלפנים בעיר מכשף ומשמים את־עם שמרון באמרו על־נפשו כי־גדול הוא׃

¹⁰ויקשיבו אליו מקטנם ועד־גדולם לאמר זה הוא גבורת האלהים הגדולה׃

¹¹ויקשיבו אליו על־היותו משמים אותם בכשפיו ימים רבים׃

¹²ויהי כאשר האמינו לפילפוס בבשרו את־מלכות האלהים ואת־שם ישוע המשיח ויטבלו אנשים ונשים׃

¹³ויאמן שמעון גם־הוא ויטבל וידבק בפילפוס וירא את־האתות והמפתים הגדלים אשר נעשו וישתומם׃

¹⁴וישמעו השליחים אשר בירושלים כי־קבלה שמרון את־דבר האלהים וישלחו אליהם את־פטרוס ואת־יוחנן׃

¹⁵וירדו שמה ויתפללו בעדם אשר יקבלו את־רוח הקדש׃

¹⁶כי הרוח לא־צלחה עד־עתה על־אחד מהם והם רק־נטבלים בשם האדון ישוע׃

¹⁷ויסמכו את־ידיהם עליהם ויקבלו את־רוח הקדש׃

¹⁸ויהי בראות שמעון כי בסמיכות ידי השליחים נתן רוח הקדש ויבא לפניהם כסף׃

¹⁹ויאמר תנו־נא גם־לי את־היכלת הזאת אשר־יקבל את־רוח הקדש כל אשר־אשים עליו את־ידי׃

²⁰ויאמר אליו פטרוס כספך יהי אתך לאבדון יען חשבת לקנות במחיר את־מתת האלהים׃

²¹אין־לך חלק וגורל בדבר הזה כי לבבך איננו ישר לפני האלהים׃

²²ועתה שוב מרעתך זאת והתחנן אל־האלהים אולי תסלח לך מזמת לבבך׃

²³כי־ראה אנכי כי־באת לידי מרורת רוש וחרצבות רשע׃

²⁴ויען שמעון ויאמר העתירו אתם בעדי אל־יהוה לבלתי־בוא עלי דבר מכל אשר אמרתם׃

²⁵והמה אחרי אשר־העידו ודברו את־דבר יהוה שבו ירושלים ויבשרו את־הבשורה בכפרים רבים אשר לשמרונים׃

²⁶וידבר מלאך־יהוה אל־פילפוס לאמר קום לך הנגבה על־הדרך הירדת מירושלים עזתה והיא חרבה׃

²⁷ויקם וילך והנה איש כושי והוא סריס ושליט לקנדק מלכת־כוש וממנה על־כל־גנזיה אשר עלה אל־ירושלים להשתחות׃

²⁸ויהי בשובו והוא ישב על־מרכבתו וקרא בספר ישעיה הנביא׃

²⁹ויאמר הרוח אל־פילפוס גשה והלוה על־המרכבה הזאת׃

³⁰וירץ פילפוס אליה וישמע אתו קרא בספר ישעיה הנביא ויאמר הגם תבין את־אשר אתה קורא׃

³¹ויאמר ואיככה אוכל אם־אין איש אשר יורני ויבקש מאת פילפוס לעלות ולשבת אצלו׃

³²וענין הכתוב אשר קרא זה הוא כשה לטבח יובל וכרחל לפני גוזזיה נאלמה ולא־יפתח־פיו׃

³³בעצר משפטו לקח ואת־דורו מי ישוחח כי נגזרו מארץ חייו׃

³⁴ויען הסריס ויאמר אל־פילפוס אשאלה ממך על־מי הנביא מדבר את־זאת על־נפשו או על־איש אחר׃

³⁵ויפתח פילפוס את־פיו ויחל מן־הכתוב הזה ויבשר אותו את־ישוע׃

³⁶ויהי בעברם בדרך ויבאו אל־מקום מים ויאמר הסריס הנה־מים מה־ימנעני מהטבל׃

³⁷ויאמר פילפוס אם־מאמין אתה בכל־לבבך מתר־לך ויען ויאמר אני מאמין כי ישוע המשיח בן־האלהים הוא׃

³⁸ויצו להעמיד את־המרכבה וירדו שניהם אל־תוך המים פילפוס והסריס ויטבל אותו׃

³⁹ויהי כי עלו מן־המים וישא רוח יהוה את פילפוס ולא יסף הסריס לראותו כי־הלך לדרכו שמח׃

⁴⁰ופילפוס נמצא באשדוד ויעבר ויבשר בכל הערים עד־באו לקסרין׃