2 Samuel 22— NLV

¹Nadat die Here Dawid van al sy vyande en van Saul verlos het, het hy hierdie lied tot eer van die Here gesing. Dit is die woorde van die lied:

²Die Here is my rots, my vesting en my Redder;

³my God is my rots, by wie ek skuil. Hy is my skild, die krag van my redding, my vesting, my toevlug, my verlosser wat my red van geweld.

⁴Ek sal roep tot die Here, Hy wat lofwaardig is, want Hy red my van my vyande.

⁵Golwe van die dood omring my; strome van onheil oorweldig my.

⁶Bande van die dood omring my, strikke van die dood wag my in.

⁷In my angs het ek tot die Here geroep, tot my God geroep om hulp. In sy heiligdom het Hy geluister; my hulpgeroep het Hy gehoor.

⁸Toe het die aarde geskud en gebewe; die fondamente van die hemele het gerammel; hulle het geruk vanweë sy toorn.

⁹Rook het uit sy neusgate geborrel, verterende vlamme uit sy mond, gloeiende kole uit sy binnekant.

¹⁰Hy het die hemele oopgebreek en afgekom; donkerte was onder sy voete.

¹¹Hy het op ’n gerub geklim en gevlieg, Hy is gesien op die vlerke van die wind.

¹²Hy het homself in donkerte gehul, watermassas en onweerswolke het Hom omsluier.

¹³Uit die gloed voor Hom het weerligstrale geblits.

¹⁴Die Here se stem donder uit die hemele; die Allerhoogste laat sy stem hoor.

¹⁵Hy skiet sy pyle, verstrooi sy vyande; sy weerlig flits, hulle is verbysterd.

¹⁶Die bodem van die see word sigbaar, die fondamente van die aarde word ontbloot deur die gebulder van die Here, deur die rukwind van sy asem.

¹⁷Van bo af het Hy sy hand uitgestrek en my gegryp, uit diepwaters het Hy my uitgetrek.

¹⁸Hy verlos my van magtige vyande, van haters wat te sterk was vir my.

¹⁹Hulle het aangeval toe ek swak was, maar die Here hou my staande.

²⁰Hy lei my na ’n oop ruimte, en red my omdat Hy my liefhet.

²¹Die Here beloon my opregtheid; Hy vergoed my onskuld,

²²Want ek was getrou aan die voorskrifte van die Here; ek was nie skuldig teenoor my God nie.

²³Sy voorskrifte het ek gevolg en van sy bepalings nie afgewyk nie.

²⁴Ek is onskuldig voor Hom en het myself weerhou van sonde.

²⁵Die Here het my opregtheid beloon, want ek was onskuldig voor Hom.

²⁶Vir die getroues is U getrou; vir die opregtes is U opreg.

²⁷Vir dié wat rein is, is U rein; vir dié wat vals is, is U vals.

²⁸U red hulle wat nederig is, maar U verneder die hoogmoediges.

²⁹U is my lig, o Here. Here, U verlig my duisternis.

³⁰Met U loop ek ’n leër storm, met my God spring ek oor ’n muur.

³¹God se pad is volmaak. Die Here se woorde is betroubaar. Hy beskerm dié wat by Hom skuil.

³²Want wie anders as die Here is God? Wie anders as ons God is ’n rots?

³³God maak my sterk; Hy maak my pad veilig.

³⁴Hy maak my voete soos dié van ’n wildsbok, op hoë plekke laat Hy my veilig staan.

³⁵Hy oefen my hande vir die geveg, my arms om ’n bronsboog te trek.

³⁶U redding is vir my ’n skild, u hulp maak my sterk.

³⁷U verbreed die pad onder my en my enkels swik nie.

³⁸Ek het my vyande agtervolg en vernietig, ek het nie omgedraai voordat hulle uitgewis was nie.

³⁹Ek het hulle oorrompel en platgeslaan; hulle kon nie opstaan nie; hulle het voor my voete gesneuwel.

⁴⁰U het my met krag toegerus vir die stryd, my teenstanders aan my onderwerp.

⁴¹U het my vyande voor my laat vlug; my haters het ek uitgewis.

⁴²Hulle roep om hulp, maar niemand kom help nie; hulle roep selfs tot die Here, maar Hy antwoord hulle nie.

⁴³Ek maal hulle fyn soos die stof van die aarde; soos modder op straat laat ek hulle uitmekaarspat.

⁴⁴In die stryd met teenstanders het U my verlos, my oor nasies as koning aangestel. ’n Volk wat ek nie geken het nie, dien my nou.

⁴⁵Uitlanders word my onderdane; as hulle van my hoor, gehoorsaam hulle my.

⁴⁶Vreemdelinge word moedeloos en kom bewend uit hulle vestings.

⁴⁷Die Here leef! Ek prys my Rots! Ek loof God, die rots van my redding,

⁴⁸God gee die oorwinning vir my, onderwerp volke aan my.

⁴⁹Hy red my van my vyande. Buite bereik van teenstanders verhef U my; U verlos my van geweldenaars.

⁵⁰Daarom, Here, sal ek U prys voor die nasies. Tot eer van u Naam sal ek ’n loflied sing!

⁵¹U gee groot oorwinnings aan u koning; aan u gesalfde is U getrou, aan Dawid en sy nageslag vir altyd!